قلمي

كنت في الظلمة الأليلة
لا يقطعها الا وميض متقطع باهت
احسست بالنسمة العليلة
فارتعش جسمي
و فكرة الراحة في عقلي تاهت
تاهت الأحلام الجميلة
و صحي ألمي
في أولئك الوحدة و السكون
و كأن الدنيا ماتت
بعد السنين الطويلة
بحثت عن يقيني في الظنون
تاه من فاهي كلمي
و ملأت الدموع الجفون
ثم بحثت عمن يقيني من الظنون
بحثت في جيوبي عن قلمي
فهو وسامي و علمي
وجدته و رفعته عاليا
ناسيا كل الشجون
كتبت في الهواء"أمل"
باحثا عنه
مازال الظلام أليلا
لكن زاد وهج الوميض المتقطع
مسكت القلم بثقة أكثر
و رسمت دائرة
فتحولت الدائرة الي هالة مشعة
ظهرت كأنها الشمس في حالة كسوف
و تحول الوميض لشعاع ضوء
و كأنه أت من تلك الشمس البعيدة
بدأت في تلوين الدائرة
فلمعت الدائرة السوداء
أصبحت شمسا
أضاءت السواد حولي
ها هو قلمي
أمامي الكثير لأرسم
و لكن أول الغيث قطرة
قد تعرفت علي قدراتي
و لم يعد يرهبني الظلام
قد اتخذت القرار
بدأت في غزل العالم من حولي
شجرة كثيفة الأغصان كثيرة الأوراق
و لكن قلمي أبي أن يكمل المشوار
فقد نفذ حبره
نفذ
انتهي عمره
بدأ ضوء الشمس في التلاشي
انها تغرب
تابعتها في ألم و أنا جالس تحت الشجرة
و بين أصابعي قلمي
غابت الشمس رويدا رويدا
حتي تلاشت تماما
تاركة الدنيا في الظلام القديم
و رجع الوميض الباهت
و هبت الريح
سمعتها تداعب أوراق الشجرة
بدأت تتلاشي أصواتها
تلاشت الشجرة
و ظل النسيم العليل
و أمسي الظلام الأليل
و باتت الدموع في الجفون
تأبي النزول
و بقيت مستسلما مع قلمي

أدق التفاصيل

بأقل كلمة ممكن تأثر في شخص,بنظرة أو حركة ممكن تاخد أقل من ثانية و تغير مصير الملايين.السر دايما بيكون في التفاصيل.

وظيفة المحامي دائما البحث عن أدق التفاصيل التي قد تساعده في ارجاح كفة موكله,و وظيفة الاخصائي النفساني ملاحظة كل حركة للمريض النفسي و كل كلمة يخرجها,لتحليل المشاكل.

مشكلة التفاصيل انها تحتاج لعين الخبير و في أوقات أخري تظهر بالصدفة البحتة.

يعني ألكسندر فليمنج لو مخادش باله من الفطر العجيب اللي قضي علي الباكتيريا,مكانش مصل البينيسيلين أنقذ حياه ملايين البشر,ضحايا الحروب و أمراض.

طبعا زي ما في تفاصيل بتنقذ حياه بشر,في تفاصيل أخري للأسف ممكن تسبب تأثير سلبي ضار.

و للأسف التفاصيل دي مش بتظهر الا بعد ظهور الضرر,الا نادرا.

يعني احنا محتاجين نحس بالتفاصيل الدقيقة المضرة دي قبل حدوث الضرر,يعني تعمل لكل حركة ألف حساب.

اللي نقدر نطمئن عليه هو الكلام اللي بنقوله,لو كلامنا خلي من الأخطاء و أي شيء قد يؤدي لسوء تفاهم,يبقي احنا في السليم.

بالنسبة للذاكرة صعب نتذكر أدق التفاصيل,و بنستعيض عن ذلك بالكاميرات و الفيديو,صحيح اللقطات والتي تسجلها الكاميرات قصيرة لكن في حالات معينة(عسكريا مثلا) تطول الفترة.

ما الداعي في ملاحظة أدق التفاصيل؟
أولا,ممكن تعمل كمحقق جنائي(زي كرومبو كدة)
ثانيا,في أي عمل سيساعدك ملاحظة أدق التفاصيل في تفادي المشاكل (لبس لون يكرهه مديرك في العمل)و طرح حلول عملية لها.(لبس لون أخر)
ثالثا,في الحياه العملية قوة الملاحظة تعتبر من أهم المهارات الذهنية لدي البشر(رادار حي).

كيف تلاحظ أدق التفاصيل؟

أولا,درب عينك في ملاحظة كل شيء حولك

ثانيا,لعب تحديد الاخلافات بين الصور,و ما أكثرها في كل مكان

ثالثا,أخرج كل كلمة و فعل بحساب.

رابعا,دائما حاول ملاحظة أي خطأ املائي فيما تقراؤه.(متقلقش,صدقني في كتير)ـ

خامسا,حاول تذكر أي تفاصيل سبق ملاحظتها.(لتنشيط الذاكرة)ـ

داري علي شمعتك تئيد

المثل ده بينقال عادة كنصيحة لشخص عشان يتحري السرية في انجازاته أو اشغاله و بيكون اما للخوف من الحسد(مع ان ما يحسد المال الا صحابه)أو تفاديا لمنافسة شخص ما.
عامة المثل دائما ينظر له من ناحية ايجابية و هي لما نداري شمعة بتستمر في انارة الطريق,لكن أنا نظرت ليها نظرة مختلفة,ممكن الشمعة تكون المصيبة اللي هتجيب حريق,و لو داريت عاليها,مسيرها ريحتها تفوح و تئيد كل اللي حواليها بالنار,و طبعا تأثيرها هيكون أكبر من تأثيرها في الأول.
بس هل المصيبة لو خبيناها ممكن تزيد فعلا؟
بفرض انك بتعمل مصيبة,و مخبي.و استمرت في طي الكتمان لحد ما فجأة كله انكشفن و بان,ايه اللي هيحصل؟
1)شكلك وحش انك كنت مخبي كل ده
2)الخسارة هتكون أكبر و رد الفعل أعنف,كفاية ان ثقة الناس فيك ممكن تنعدم
3)كفاية تتخيل ان المصيبة حفرة كل ما خبيتها أكتر كل ما أصبحت أعمق و لو انكشفت بتقع في القاع

بس احنا بنفكر ازاي؟
عادة بيكون همنا المدي القريب,ان فلان ميعرفش,لكن مش بناخد بالنا علي المدي البعيد ان وقع كشف المصيبة هيبقي أكبر,كفاية ان المصيبة هتبقي بجلاجل,و كل ما تستخبي أكتر كل ما تزيد جلاجلها(هو يعني ايه جلاجل أصلا؟)

صديق لي اتصل و هو في حالة غضب من صديقه لأنه أخبر والدته انه لسة بيدخن,بالرغم من انه وعد والدته انه هيبطل.كل همه ندالة صديقة اللي ملهاش حل,صحيح صديقة غلط بس هو أغلط,لأنه داري علي مصيبته لحد ما وقع فيها.طبعا انك تكشف المصيبة بنفسك(تنزل في الحفرة بنفسك) بيكون أفضل ليك,مهو الاعتراف بالحق فضيلة,و يمكن بيكون وقعها أقل,يكفي انك انت بتقول و عامل حسابك من رد الفعل,أحسن من ان شخص بيهدي النفوس يفتن عليك و علي مصيبتك أو انت تقع بلسانك في الحفرة.
بالنسبة للمصايب بتاعت نصابين مصر,فهي كل ما بتتداري,كل مالنصباية تزيد,و طبعا لو حد كشف عن الحريقة اللي الشمعة مولعاها,الشمعة بتكون فص ملح و داب,قبل حتي ما تفكر تجيب طفاية حريق.مهو لو جيت تبص,هتلاقي كل اللي سرقوا و نهبوا صدرت ضدهم احكام,انطلقوا علي سويسرا و لا انجلترا و لا بوركينافاسو,فص ملح و داب.
عامة,انت لو مدكن مليارات داري عليها عشان لو مصلحة الضرايب شمت خبر هتحصل الضرايب بالفوايد,مش كدة و لا ايه؟
كفاية عليكم كدة و الموضوع الجي ,و لا بلاش خليني مداري عليه,اصله مصيبة هو كمان.

رباعيات صاحي - السيجارة

السيجارة مش بتشيل كفنها
حتي و لو مات ألف عشانها
زي ما في ميتين دوشنها
في الاف مبطلين و وحشنها
و عجبي

أغنيلك؟

عايز اغنية تغني و تسمع
و بعدين الاقيك حافظ و مسمع
خد دي مني اسمع و استمتع

شوية مواويل علي طبل و زمر
رقص بلدي علي رقص هنود حمر
و بنات حلوة موت و شقرة و سمر
يا شمس تلعلع في السما و سهرة جمر

اغني راب و لا بلدي و لا عادي
اغني لتوباك و لا سليم شادي
اعمل كولو بامية ولا حادي و بادي
ايش جاب طب الكرومب للزبادي؟

عايزني اغني طب للاهلي و الزمالك؟
و لا اغني حزايني لغزة و المهالك
و لا عن الفراق,الحب,الاشواق اللي فبالك؟
و لا في حبك يا مصر, اتغزل في جمالك

و لا عايزني اسب و العن و اقول فشتايم
و اقول علي دول و دول شوية بهايم
و اعيش في دور جيفارا و اني بثورة قايم
و ان الكل غرقان و انا لوحدي اللي عايم

طب سيبكم يا اللي بتسمعوا من صوتي
صوتي مش حلو و هنقطكم بسكوتي
بس شوفوا الكليب حصريا بحريم نوتي
علي قنوات روشانا و دوشانا و منفلوطي

قصور العشق

أعلم اني تأخرت في الوصول لكنزي
لأجده قد نساني و لم يعد يريدني مالكا له
لكني أثق في أن من يبحث يجد
و من طرق باب الأمل فتح له علي مصرعيه
فلا يظهر الألماس الا في أعماق الأرض
و لا يظهر الذهب الا كعروق في الصخر
و من تكاسل عن الذهب فليرضي بالنحاس
و من تكاسل عن النحاس فليرضي به صدءا
قد تجد الكثير ينفي وجود قصور العشق
و لكنه يستعيض بالكسل عن البحث
و ان سمع عن شخص وجد قصور العشق
فسيشك في الخبر أو يقول انه مجرد موهوم
انه يوهم نفسه ليريحها من البحث أو الندم
و كأنه يداوي الجراح بالمسكنات و هو لا يداويها
بل يخفف ألمها,و قد يظل ينزف و هو لا يشعر.
لذا يجب أن نصحو من غفلتنا و مسكناتنا
و لنفتح الجروح القديمة و ان سال دمها
و ليكن ذلك لتنظيفها و تطهيرها من سموم اليأس
فان كنت صانعا لأسلحة اليأس و الكسل
فانك ستدمر نفسك بأسلحتك ذاتها
و ان كنت صانعا لأسلحة الجد و الأمل
فانك ستحمي نفسك ضد الظروف
و تلك الكلمة معناها معروف
فهي حجة الفاشل,دائما عليها ملهوف
ففشله جاءه في مظروف
و قدره أن ريشه منتوف
و كل ذلك بسبب الظروف
و لا توجد للحب قصور بل كهوف
و ان كان بالفعل لا توجد في الواقع,
فأنت قادر علي أن تبني لك قصرا في خيالك
و كما بامكانك جعله مجرد خيال
يمكنك كذلك جعله قريب المنال
فكما قيل من قبل لا يوجد محال
و لا تنشغل عن الحب بالجدال
و لا تفر و تتصنع له الانشغال
فكم شخص ذاق لأجله الأهوال
و تخطي الظروف و الأحوال
و كم من شخص انشغل بالأمال
و ملك المال بعد ان صال و جال
ليكتشف غياب ما لا يشتري بالمال
فلا رفيق يحبه و لا عشق نال
و هنا يتضح اهمية التوازن

تخيل لو عشرين مليون مواطن مصري...

تخيل لو عشرين مليون مصري قرروا يهاجروا,ربع مصر هيفضي و الأسعار هتقل و البطالة هتختفي.

تخيل لو عشرين مليون مصري قرروا يعملوا اضراب ضد سياسات الحكومة,الحكومة هتفتكر اللي حاصل في اليونان و تتعظ.

تخيل لو عشرين مليون مصري قرروا يسكنوا في سينا,ساعتها هينتقل الشريان الضيق لحيز أوسع و تقل الكثافة السكانية.

تخيل لو عشرين مليون مصري قرروا يقاطعوا المنتجات المحتكرة,ساعتها المحتكر هيضطر يسيب فرصة لوجود منافسين.

تخيل لو عشرين مليون مصري قرروا يطفوا النور و الكهربا لمدة ساعة,ساعتها هيوفروا كمية كبيرة من الطاقة.

تخيل لو عشرين مليون مصري قرروا ينطوا لمدة دقيقة,ساعتها هيعملوا هزة أرضية تهز مصر و الدول المجاورة.

تخيل لو عشرين مليون مصري قرروا مينفضوش,ساعتها الناس هتحس بفرق كبير في كل حاجة حواليهم.
تخيل

غير

ليه
لما بنلوم
بنلوم عالغير؟

ليه
لما بنغضب
بنلعن الغير؟

ليه
لما نتوه
بندور عالغير؟

ليه
لما نهرب
نرجع نحن للغير؟

ليه
لما بنحزن
بندور عالغير؟

ليه
مش بنشوف
من اتجاه الغير؟

ليه
بنسب غيرنا
و احنا لغيرنا غير؟