تقولش الحكومة حلت كل المشاكل,نسبة البطالة تحت الصفر,الشعب كله عايش في فلل و مستوع التعليم نفتخر بيه و الدنيا فل.متبقاش غير الأذان,و يقولوا مشروع قومي لتوحيد الأذان,هما قادرين يوحدوا العرب عشان يوحدوا الأذان؟بعدين بفرض انهم وحدووه(لا اله الا الله)مش هيكون حاله زي حال عواميد النور اللي بتنور في عز الظهر و تطفي في ربع شوارع القاهرة بالليل؟يعني الراجل يغفل و ياخد تعسيلة أو يتزنق و يدخل الحمام و يطول,و لا الأذان الطتروني و هيهنج زي حكومتنا الالكترونية؟.يمكن كمان الحكومة تلاقي الأذان مزعج فتقلبه سايلنت و يا سلام لو فايبريشن تلقي المئذنة بترقص.طب (المشروع القومي) ناويين ينفذوه امتي؟يعني بقالهم كتير ناسيينه.تلاقي جم يناقشوه في مجلس الشعب و نسيوه في غمرة أزأزة اللب أو حتي حد فاق من النوام فرفع جزمته علي النائم اللي جنبه فانشغلوا عن مناقشة المشروع.لا داعي للقلق,مهو يمكن مصيره زي مصير مشروع تلفريك اسكندرية اللي بعد 9 سنين مناهدة المحافظة موافقتش عليه,أو حتي اللي كان هيمول المشروع من رجال الأعمال اللي خلعوا بعد صدور حكم عليه.يقال ان اسرائيل قلقت علي المشروعانه متنفذش,عشان كدة رئيس الوزرا كان بيسلم علي عم طنطاوي و بيسأله علي المشروع.و غالبا عايزين يستفيدوا من خبراتنا في المجال ده عشان يوحدوا أذان معابدهم اللي كانت جوامع أثرية و قلبوها معابد يهودية.كفاية كلام في الموضوع عشان بدأت أتعب,لنا لقاء في الحلقة القادمة بعد تنفيذ المشروع القومي(لما تشوف حلمة ودنك)
