عيد ميلاد صاحي

يا جماعة الفترة اللي احنا فيها دي فترة مناسبات,يوم الأرض,يوم اليتيم,يوم الغضب,يوم الحرايق,و أول عيد ميلاد لصاحي,طبعا مش بس كدة,ده كمان صاحي تخطت ال100 موضوع,الموضوع رقم 100 كان "قصة مكتبتين",غير ان عدد المشاهدات تخطي ال1500 مشاهدة.أحلي حاجة ان أول انجازات العام الجديد, فتح جروب باسم المدونة علي الفيسبوك تخطي أعضاؤه ال30,معلش مهتم شوية بالارقام,فترة امتحانات و هندسة و كدة,نأتي للسؤال المرعب,هل هعمل بحث الجبرتي في ال100 موضوع لأعطيكم الملخص المفيد؟
و الله انا شايف ان المدونة محتاجة تجديدات,نتيجة للتطور التكنولوجي,ضيفنا تصنيف للموضوع الي جانب التعليق,يعني لو مكسل تعلق.طبعا أي تعليقات أو اقتراحات أنا هستقبلها بصدر رحب و هنفذ التعديلات اللي شايفين المدونة محتاجاها,المدونة ليكم في الأول و في الأخر.
و طبعا زي جريدة الوسيط,رجاء قل انك قرأتها في صاحي...و خلي الكلام صاحي.

قصة مكتبتين (Disclaimerانكار )

هذا أول دحض/تعليق لي علي أي موضوع كتبته قبل كدة,كنت مضطرا لكتابة هذا الدحض كي لا أفهم خطأ,و لأجيب عن عدة أسئلة واجهني بها بعض القراء مشكورين.
بداية,سعدت بكل من سألني عن مغذي ذكر ديانة أبطال القصة,و هذا ما كنت أتمناه بالفعل,فأنا لا أري أي فرق بين أي ممن يدينون بهذه الديانة عن تلك,خاصة حين يتحد الجميع في صفتي,بشر و عرب,و هذا ما قصدت من كلمة(و هذا لا يعني شيء الا للسطحيين)فالسطحيون هم الذين يفرقوا بين هذا و ذاك في الديانة.كذلك أصريت علي كتابة ديانة الشخصين لمعرفتي لحقيقة كثرة السطحيين و الذين قد ينحازوا في التعامل مع من من دينهم,برغم أن الرسول عليه الصلاة و السلام كان يتعامل مع الناس من أهل الكتاب,فلا يوجد ما يحرم التعامل مع ذوي الديانات الأخري بأي حال من الأحوال!فعنيت انه برغم اختلاف الأديان اندفع كل الناس للتعامل مع الأعلي خلقا و أكثر تبسما,و في كلامي تأكيد علي ان الأقباط يمكنهم كسر عزلتهم عن الأغلبية بكل بساطة,تكفي الابتسامة.
نرجع لقصة الابتسامة في التجارة,ذكرني أحد بأن أهل الشام من أفضل التجار,و سر ذلك الأدب في التعامل و الكلام المعسول الذي قد يكلفك الكثير من المال,فلا مقاومة له الا الطرش.
أرجع مرة أخري للكلام في الديانة,أكثر ما يحرق في دمي و يرفع ضغطي حينما يخبرني شخص,مش فلان طلع مسيحي,و لما أسأله مش عربي,يقولي لأ ده مصري,يعني المصري مش عربي؟و لا انسلخنا من العروبة و هنسلخ كمان الأقباط من قوميتهم؟
و الله العظيم,يوسف شاهين,ماري منيب,هاني سلامة,يوسف داود,أنيس منصور,جورج سيدهم ,و دريد لحام كلهم عرب*,و لا ديانة و لا يحزنون,الدين لله و الوطن للجميع.
و في النهاية أشكر كل من كان له صبر ليقرأ القصة لنهايتها,أو انتهي لنصفها أو حتي اكتفي بالعنوان.
كذا أعتذر لثقل اللغة الفصحة عليك و علي,و ان كنت في التليين.

*ملحوظة:للناس السطحيين,اه,مش كل الناس المذكورة أقباط.

قصة مكتبتين

زمان لما كنت في ابتدائي,كانت تجاور مدرستي مكتبة مستلزمات مدرسية,و عندما تصعد عبر تلك السلالم الحديدية المطلية باللون الأسود و تدخل لتلك المكتبة مظلمة الأرجاء,تشعر و كأنك رجعت بالزمن عشرين عاما مرة واحدة.و كان يقف فيها ذلك الرجل أشيب الشعر,فظ التعامل,و حين الفسحة كانت تزدحم المكتبة بزبائنها من الطلبة من ابتدائي حتي ثانوي,و كان ذلك الرجل يتعامل مع الطلبة علي انهم لصوص حتي تثبت براءتهم,و رغم ذلك كان ينقذ زبائنها موقعها الاستراتيجي أمام بوابات المدرسة. و بدأت التجديدات في موقع محل مجاور كان مرتع للكلاب و ظهرت التكهنات و التخمينات حتي ظهرت معالم المكتبة الجديدة,مطلية واجهتها باللون الأبيض الذي تفوق علي الألوميتال الغامق للمكتبة القديمة.و ظل فعلا مسمي المكتبة الجديدة و المكتبة القديمة.المكتبة الجديدة كانت أوسع و برغم ازدحامها بالزبائن,كانت دائما منيرة.لم تتفوق المكتبة الجديدة علي القديمة في الاتساع و الشكل العام فحسب بل ساهم في ذلك أيضا مالك المكتبة و زوجته.لقد كانا دائمي التبسم,بسم الله ما شاء الله.و برغم كونهم أقباط(و هذا لا يعني شيء الا للسطحيين)فزبائنهم زادت علي زبائن المكتبة القديمة ذات المالك المسلم الكشر.بل قام المالك بتعيين شخص يقف بدلا منه في عملية البيع. ظلت المكتبتان المتجاورتان متنافستين.و برغم افتتاح فرع مكتبة مشهورة علي بعد شطرين سكنيين,ظللت ازور المكتبة الجديدة,بل قد استشارني مالكها في تأجير غرفة أسفل المكتبة و تحويل نشاطها لسايبر كافيه,و بالفعل قام بعمل هذا النشاط.قد تكون نتيجة للأزمة الاقتصادية الحالية أو غير ذلك,قد سمعت أخبار جديدة بعد مدة طويلة من عدم زيارتي لأي من المكتبتين,فقد سمعت أن المكتبة القديمة بدأت في الاغلاق و انهاء نشاطها.قد افتقد جو الثمانينات التي كنت أعيشه فيها لكني بالتأكيد لن أفتقد مالكها. هذا يدل علي أن اختلاف الأديان لا يفسد للود قضية. كذلك يدل علي انك كتاجر,ابتسامتك هي أول وسائل الحفاظ علي الزبائن.فلا شيء أثمن من ابتسامتك,كفاية ان تبسمك في وجه أخيك صدقه,مش كدة برده و لا ايه؟

دفعة كوم برومين و تسعة

الدكتور كان بيقول انها مسألة وقت و يخف,بعيد عنكم الواد رائد بقاله فترة في السرير,قال ايه,عنده برومين,و قاعد يهلوس من ساعتها,رحت رايح جري اجيب ورقة و قلم أكتب وراه الهلاوس,يمكن يا هلوسة انهاردة بفلوس بكرة تبقي ببلاش,و الهلوسة البيضا تنفع الدفعة السودا.
الواد كان بيقول اييه؟
الدفعة ام برومين يشيلها اتنين
دفعة في بروم خير من دفعتين علي الشجرة
يوجد البرومين في اللحمة و يوجد برومين واحد حيواني و التاني نباتي
فضلي برومين و أطلع برا
يا داخل بين الدفعة و طلبتها,ما ينوبك الا بروماتها
لا تضع الدفعة كلها في برومة واحدة.
و كان بيغني أغاني كدة من قبيل:
برومين,برومين دول و لا عينين...
يا يا يا بروم تقيل,يا يا يا مشيبني...
بين برومين و ميا...
انت برومي,قبل متشوفك عينيا,عمر ضايع...
لأ دي بتاعتي,لأ دي بتاعتي,يا سلام ياختي...


أنا قلقت و كلمت دار الافتاء أسألهم في شرعية البرومين,و كان الرد"لا يجوز شرعا حيث أنه درب من دروب الطمع,و بالطمع يقل ما جمع,الا و النبي يعني ايه بروم؟"

لجأت لدكتور نفسي و قال"فرويد بيقول ان ده نتيجة طبيعية لعقدة من الطفولة,انت كنت بتاخد اللعب منه و هو صغير؟"

لجأت لمبرمج,قال ان الدفعة هنجت من كتر الداتا,فحصل أوفرلود,حسوا انهم بياخدوا منهج دفعتين,أو يمكن في انفنت لوب في النص.

عامة أنا متطمن لكلام الدكتور الأولاني و ان شاء الله بروم يفوت و لا حد يموت ,و العبوا مع بعض متتخانقوش
كان عندي سؤال,هو هيكون في برده ملك و ملكة البروم و هيرقصوا مع بعض و العك اللي بيحصل في الأفلام الأجنبي؟و لا الحوار رقصات بلدي بس؟

أعتذر للقراء لبواخة الموضوع و طعمه المر,لكن أعمل ايه,هو الموقف بايخ و مكانش في أنسب من مقالي ده عشان أعلق عليه.الي جانب ازدياد الطلب و الالحاح علي عشان اكتب في الموضوع.

كلام و واقف في الزور

كتير قال من كتر الكلام
الكلام بيفقد معناه
و كتير اتمني يسمع كلام
و الكلام ما بيلقاه
و كتير قال كلام
و في وقت الكلام منه تاه
و كلام له معني
و تلقي الناس هجراه
و كلام أي كلام
و الناس دايما سمعاه
و ناس بتوع كلام
و الفعل مش عاملاه
و كلام بييجي عالجرح
و الناس مش طايقاه
كلام الأغاني
هجر و هيام
و سنين و شهور و أيام
مجرد كلام
و بعد النكبة
شوية كلام
يسكن الألام
أو كلام القاضي
يعالج الألام
و الباقي علي الاعلام
بشوية كلام.
يا يفوق الشعب بالكلام
يا يموت و نفسه
يقول كلام.
أخر الكلام
خير الكلام
ما قل و دل

مواقف يومية:بدون كلام 2

مواقف يومية:بدون كلام

رباعيات صاحي - حال العرب

كان الكلام داير و فلحظة وقف
كان عايز يكمل بس اكتشف
كان في ألف أذن سامعة
لكن مفيش أذن بتنصت فاتكسف
و اسفي

تخطي الأمواج و البحور
حالف ما يوقف طريقه سور
صحيح كان اتجاهه غلط
لكن اكتشافه خلاه مشهور
و عجبي

فارس بيزمجر و رافع سيف
يمكن صوته هو المخيف
لكن حصانه وسيفه خشب
دقق هتلقي الفارس كفيف
و اسفي

شاب لطبيبه من مرضه اشتكي
شاف الحقنة,صرخ و بكي
بعدها محسش غير بألم في حلقه
و عن قهره لخوفه,قال و حكي
و عجبي

هب و قال,سامع الخطر
و بعد شوية هطل المطر
لا الرعد أذانا بصوته العالي
و لا سقف السما من البرق انشطر
و عجبي

من بعيد تشوف جيوش في سكون
تزعزع القلوب و ترهب العيون
لكن من قريب,تموت من الضحك
مجرد تماثيل,بورق معجون
و عجبي



الحبة دول بعنوان حال العرب,هو مكنش المقصود العنوان لكن ده اللي كان عالبال أثناء الوحي

كلام في الأزمة-3

أنا شايف اني كلامي في الأزمة كتر قوي لدرجة اني بدأت أتقمص دور دكتور في كلية الاقتصاد و العلوم السياسية!!بس في وقت الأزمة لازملنا لازمة,نحاول نحقق و ندقق في تأثيرها علينا,و طبعا عين هنا و عين هناك,نشوف أمريكا سبب بلاوينا بتتداوي من الأزمة ازاي,يمكن يكون طريقة علاجها تساعدنا في الخروج من الأزمة بأقل الخسائر.
المهم بقرا الجريدة كالعادة استوقفني كلام في الأزمة,قال ايه,أمريكا بتأمم بنوكها,يعني العلاج في التأميم,و مصر بقالها فترة بتخصخص كله,و تبيع في أصول الدولة للمستثمرين,اللي هو الشعب سأل ناقص كام هرم متخصخصش...
طبعا أصابتني ضحكة هيستيرية,مهو كوميديا سوداء,ماما أمريكا رأس مالية,يلا نخصخص كله,و بعد ما خصخصنا,ماما أمريكا ضحكت علينا و قالت ان الحل في التأميم,اخص من الخصخصة و اللغوصة,ناس مش راسية علي بر,مرة نأمم و مرة نخصص,مرة نبني و بعد اسبوع نهدم,مرة نلغي سنة سادسة و مرة نرجعها,
و طبعا لا الشعب رضي بالبرايز الورق و لا الجنيه المعدن,و لا الحكومة رضيت بالتأميم و لا رضيت بالخصخصة,أنا شايف ان علي رأي القذافي,زي ما بيدعو لاقامة دولة اسراطين,لازم نأسس نظام الاشتمالية أو الرأسراكية الاقتصادي,و ده نوصل له باننا نأمخص المصانع أو نخصمنها(مش نخلص منها!!).مهو خير الحلول الحل الوسط و حسبي الله و نعم الوكيل.
و كل خصمنة و انتم متأمخصين.

كلام في الأزمة-2

و كالعادة رجعت بكل سعادة عشان أكمل الموضوع الأخير"كلام في الأزمة" بالمقال الثاني في الأزمة
هو صراحة أنا سبت الموضوع مخصوص لمدة كافية ليطلق عليه موضوع بايت,و الموضوع يكون بايت و طعمه حلو أحسن من طازة و طعمه مر,مش كدة و لا ايه؟
سيبكم من طبق اليوم اللي فوق و نرجع لكلامنا في الأزمة.الخبر التاني كان ببساطة,اشهار شركة أمريكية اسمها "بيرينج بوينت"افلاسها نتيجة للأزمة الاقتصادية العالمية,هو الخبر عادي,في مية أو ألف أو ميت ألف شركة أغلقت من ساعة ما الأزمة دقت باب الاقتصاد العالمي.لكن اللذيذ ان الشركة دي هي اللي كانت بتدير المعونة الامريكية في مصر و سئولة عن عدد من مشروعات الاصلاح فيها,و تقوم بنصح الشركات المصرية لتتفادي الافلاس بعد الخصخصة.يعني من الأخر باب النجار و بيته كله اتخلع,و مبني المطافي ولع.طبعا احنا كدة نطمئن.
كدة انتهي الخبر و تعليقي عليه,مهو أقول ايه تاني فيه؟الخبر يتحدث عن نفسه.
طبعا عشان مينفعش يكون الموضوع كام سطر و السلام,فلسة كلامي في الأزمة مانتهاش.
ايه تأثير الأزمة علينا؟
سؤال كنت سألته لمهندس اتصالات في شركة اتصالات,هل أسعار خدمات الاتصالات هتقل؟مع العلم ان في أوروبا (مش متأكد من أمريكا)و برغم من ان خدمة خطوط المحمول جودتها أعلي بكثير من جودة خطوط الشركات المصرية الا ان أسعار الخدمة هناك منخفضة لدرجة ان خدمة الخط الأرضي"أغلي" من خط المحمول,و الحكمة في ذلك ان الخط الأرضي مازالت جودته أعلي من خط المحمول.
طبعا كان الرد القاطع"انسي,برة أه الخدمة سعرها هينخفض كنتيجة طبيعية للأزمة,لكن في مصر انسي يا عمرو,سعر الخدمة في مصر أغلي من أي حتة,كذلك في مجال ال(ايه دي اس ال)"
.تدخل مهندس أخر في شركة اتصالات قائلا "ان خدمة ال(ايه دي اس ال) في الامارات أغلي",فرد الأول ان سبب ذلك انهم خطوط تليفونهم فايبر اوبتيك و لا تعمل خدمة ال(ايه دي اس ال) الا علي خطوط النحاس,لذا فهناك بعض التقنيات التي تستخدم لتنفيذ الهدمة مما سبب رفع ثمنها,لكن غير كدة لا يوجد سبب أخر.
انتظروا المزيد,أنا نفسي بدأت أزهق,بس أعمل ايه,كل شوية يستفزني كلام في الأزمة.