يا واد يا مؤمن
ممكن طلب بسيط؟
ممكن لما أموت و ده قريب ان شاء الله تسأل عني؟
إسأل إللي إستخدم الخرطوش ضربني قبل الساعة سبعة بكام دقيقة
إسأل إللي قتلني مين همه يخفي الخرطوش من العيون
إسأل اللي قتلني قتلني على بعد كام متر من الداخلية
إسأل اللي قتلني هل كنت أعزل
إسأل إن كان في صباعين مرفوعين أم عشر صوابع مرفوعة في الهواء
إسأل اللي قتلني هل باليد و الحجارة أقتحم وزارة الداخلية؟
مش هطلب منك تسأله كنت بأعمل إيه قبل ما يقتلني و ملابسات الأمور
أصلي في الملعب كنت أو في الشارع مش طالب لقب شهيد من اللي هيهدر حقي,
و لا أمي هتنتظر تطيب خاطر من لحية مزيفة تلقبني قبل مقتلي ببلطجي لا ثائر.
بس ممكن تسأله قتلني في عهد مين و مجلس برئاسة مين و نوابه مين و مش محتاج تسأل عن نتائج لجنة إستخصائية...ريح دماغك
,هو لجنة 28 يناير و لا 2 فبراير و لا 3 مارس و لا 9 أبريل و لا 1 مايو و لا 28 يونيو و لا 8 يوليو و لا 1 اغسطس و لا 9 سبتمبر و لا 9 أكتوبر و لا 19 نوفمبر و لا 16 ديسمبر ولا ولا ولا طلعت؟ لسة حريق القاهرة سنة 1953 اللجنة الإستقصائية معرفتش مين اللي ولع البلد...
إسأل إللي بيحيي المجلس العسكري إن كان ساعده في محاسبته على قتلي ولا إترقى لقتلي و أضاف لنياشينه الجديد
و لا أقولك....هو سؤال واحد لأن وقته قد لا يسع...لإنشغاله في قتل اللاحقين من بعدي....هل قتلي صحى حد؟و هل هيصحى لمدة طويلة؟
و إن قابلت والدتي ممكن تسألها إن تقدر تغفرلي؟
و إن قدرت تقابل إخوات الصغيرين...ممكن تطلب منهم ميصدقوش غير إللي شافوه مني مش اللي بيوريه الإعلام عني؟
متسألش صحابي على صورة حلوة لية تضيفلها الشريط الأسود
أنا نقيت صورة...نفسي أموت و الناس فاكراني بيها
و فيها رسالة بسيطة لكل اللي أهدر دمي بسؤال محاولش يعذرني بإجابة تبرأني من تهمة البلطجة,فلا أقاربي و لا أصدقائي هيردوا الرد اللائق في هكذا مناسبة...و قررت أريحهم من هكذا سؤال.
