لحظة ترقب

حياتنا كلها ليست الا لحظات...لحظات ننساها,ولحظات تدوم معانا العمر كله,لحظات تحيينا,و لحظات بتطعنا ألف طعنة,لحظات تفرقنا عن الطفولة و النضج.هل في في عمرنا لحظات صعبة؟هل ممكن نقول ان في في عمرنا أصعب اللحظات؟طب أصعب لحظة ممكن تكون ايه؟مش شرط تكون لحظة حزن,و لا لحظة ضغط...أكيد في لحظات كتير ممكن نعتبرها أصعب اللحظات,و ده اللي بحاول أطرحه عشان أترك لكم الحكم في النهاية لتروا بأنفسكم أصعب اللحظات.

___________________

الصراحة,أنا حاسس ان الترقب غير الانتظار,و انتهيت لاني هعمل لكل منهم لحظة,يمكن يظهر الفرق و الاختلاف. تخيل معي انك ماشي في أحراش استوائية...و مجرد معاك كاميرا و بتصور الطبيعة الساحرة الخلابة.و اذ فجأة ظهر أمامك أسد,عينه تنطق بالجوع...في بالك ردود الفعل هتنحصر في حاجتين. أولا:تجري و تتسلق أقرب شجرة ثانيا: و هو الأرجح...هتتجمد في مكانك من الرعب,و هيتشل جسمك و يتوقف تفكيرك...مع ان قلبك بيخفق بكل قوة أكنه بيحاول يخرج من صدرك و يجري.يمكن اللحظة تطول و يمكن تنتهي بان الأسد يفترسك,أو يهديك تفكيرك لتمثيل دور الميت,حتي ينفر من جثتك الأسد(فالأسود لا تأكل الجثث)أو تجري و لا أسرع سباق في الماراثون. لحظة التجمد قد يكون تفسيرها عدم استيعاب المفاجأة أو الصدمة فبت"هنج"...عامة أهم حاجة انك في الحالة دي تتملك أعصابك و متفقدش الوعي,عشان متكونش وليمة لذيذة للأسد و أشباله. كلمة ترقب هنا معناها...حدوث موقف مفاجئ,و نتيجته تكاد تعلمها,و لكنك تنتظر النتيجة.بعكس الانتظار اللي ممكن تكون فعلا عارف النتيجة برده بس مش شرط يكون الموقف مفاجئ.بعدين الانتظار ممكن يطول,لكن في الغالب الترقب بيكون أقصر في الوقت,و أصعب في استيعاب الصدمة. يمكن يكون الترقب في ترقب خبر وفاه شخص في حالة حرجة او نتيجة حرب...يمكن الترقب هنا بيكون فيه انتباه أكتر من الانتظار.يعني بالنسبة للانتظار,ممكن تتشاغل بحاجة منتظرا ميعاد ما...بعكس الترقب اللي بتكون ذهنك معظمه مركز علي ما تترقبه.ليه ممكن يكون لحظة الترقب صعبة؟أولا لأنها بيختلط بيها لحظات أخري صعبة مثل "لحظة قرار" أو "لحظة تأمل" و كذلك "لحظة تحدي" الي جانب الحيرة التي تلازم التلات لحظات دول,كلهم مختزلون في لحظة قصيرة,بالنسبة للحظة القرار,بتكون تحت ضغط قصر الوقت و التوتر فبيكون صعب جدا اتخاذ القرار...مما يؤدي للتهنيج.بالنسبة للحظة التأمل...بالرغم من "تهنيج" فكرك و شلل جسمك,تستيقظ كل الاحاسيس نتيجة لضخ الأدرينالين في جسمك.و طبعا لحظة تحدي...واضح جدا انه مش تحدي لحظي سيمر مرور الكرام,لكنه تحدي بناء علي نتيجته سيتححد ان كان لك مستقبل أم لا...هذا في مثال مواجهة الأسد,لكن في الواقع...يكون التحدي أخف قليلا,مثل ظهور نتيجة امتحانات أو ما الي ذلك من المواقف المصيرية.أوقات بيكون الترقب في التأكد من خبر سيء جدا نتيجة لعدم تصديقك له,لأنه صدمة كبيرة. طب الحل ايه لتخطي اللحظة دي بأقل خساير؟ بغض النظر عن الخساير اللي مترقبها,حاول تخلي ايمانك بالله أقوي,و حاول تتفائل...اقرا قرأن,غني أغنية بتحبها,حاول تقلل تأثير صدمة الحدث اللي مترقبه عليك,سواء نفسيا و معنويا,أو ذهنيا.و بالطبع أهم حاجة الصبر سواء قبل الحدث أثناء الانتظار أو بعده كصبر علي البلاء.و طبعا الاستعانة بأقرب الناس ليك بجانبك لأنه هيحاول بقدر الامكان تخفيف الصدمة, و احتواء الصدمة.بالنسبة للصدمة...بعدها بتكون في لحظة تأمل...يمكن بتحتاج فيها تبعد عن الناس أو تهرب من أي صوت...مجرد بتعطي ذهنك فرصة لاحتواء الموقف...حتي لا يحدث انهيار.الخوف من ان الصمت يأثر في النفس باكتئاب,لا قدر الله.عامة مش كل اللحظات الصعبة بنقدر نتحكم فيها,و لو كان في لحظات معينة احنا اللي بنختارها,اللحظات هي اللي بتتحكم فينا و تغيرنا,و بالتأكيد ما نأمله أن تكون تغييرها و تأثيرها علينا ايجابي. أنا تحدثت عن لحظة الترقب من زاوية ضيقة.لذا سأحاول توسيع الزاوية قليلا باعطاء مثال أخر هام. هو يوم 6 ابريل...أنا أكاد أحسب كل يوم ما تبقي من أيام علي ذلك اليوم,نتيجة لأهميته بالنسبة للشعب لأنه رد فعل ل27 عام مضت في حال لا يسر غالبية الشعب المصري.بالرغم من عدم وضوع نتايجه بعد,لكن ترقب تنفيذ الاضراب العام هو أصعب شيء,لأننا انتظارنا طوال السنين الماضية لتتحسن الأمور.حان وقت ظهور صوت الأمة,حان وقت صحوة الكلمة.

النســ%ــبية

واحد:انهاردة كان يومي صعب أوي!!و بعدين مرهق جدا
التاني:لااااا,يومك ييجي و لا حاجة بالنسبة ليومي,أنا منمتش كويس امبارح!!
لما حد ييجي يسمع الحوار ده مش هيكون عارف مين أتعب من التاني,بس ممكن يحكم من كلام التاني انه يومه أصعب.بس لو جينا نسأل و ندقق,ممكن نلاقي الأولاني منامش غير ساعتين و مقضي اليوم كله علي رجليه,و التاني نام 5 ساعات.و يمكن اللي نام ساعتين ده الطبيعي بتاعه كدة و متعود علي كدة,و يمكن يومه بس اللي كان صعب.
الموضوع كله نسبة و تناسب,و ممكن الاتنين يفضلوا يجادلوا بعض مين يومه اصعب و مين أتعب من التاني...و برده مش هيوصلوا لحل,الا لو بدلوا مع بعض أجسادهم,مهو برده كل واحد له طاقته و عضلاته و قدراته.
احنا كناس مختلفين و بنشوف الأمور بزوايا مختلفة,عشان كدة ظهرت كلمة "بالنسباله ولا حاجة".يعني ممكن حجر تقيل ,وزنه ثابت,5 كيلو,واحدة ممكن تحاول تشيله,مش هتعرف ترفعه لفوق,شخص ممكن ييجي يشيله,هيعرف شوية,شخص بقي من بتوع رفع اثقال ممكن يرفعه و لا أكنه بيرفع ريشة,بالنسبة له ولا حاجة,هو الحجر نفس الحجر بس بالنسبة لكل واحد اختلف الوزن.برده لو جينا نتكلم عن الجاذبية,هي برده بتكون حسب انت فين,جاذبية الأرض عند القطب تختلف عنها علي خط الاستواء,و بعدين كل كوكب بيختلف عن التاني في الجاذبية.و الوزن بيكون نسبي هنا,عشان كدة في الفيزيا بيتعاملوا مع الجسد كـ"كتلة" مش كـ"وزن" لأن الكتلة ثابتة لكن الوزن بيختلف حسب المكان اللي بنقيس فيه.بعدين لو حطينا ميزان في أسنسير,و هو نازل هنلاقي وزنننا أقل من و هو ثابت,و لما يتحرك لفوق هنلاقي بيظهرنا أزيد من و هو ثابت.بعدين لو جينا نبص في مجالات تانية هنلاقي ان في حاجات كتيرة بتكون نسبة و تناسب.يعني لو جينا نبص علي "القيم و المفاهيم",مش بتكون واحدة في كل البلاد,بتكون حسب العادات و التقاليد و البيئة و حضارة الناس و تاريخهم و ثقافتهم.يعني نلاقي مقدار العلم بيختلف من طالب للتاني,و كذلك من دولة للتانية أو من عصر لأخر,بالنسبة لينا التلفزيون حاجة عادية,يمكن بكرة نكون بالنسبة لأحفادنا ناس قديمة و يكون رأينا في التلفزيون نفس رأي أجدادنا في الراديو.قصة قريتها قبل كدة عن مجموعة كفيفين قربوا علي فيل و بدأوا يحسسوا عليه,اللي يقول انه طري و رفيع جدا,و اللي بيقول انه علي شكل أنبوبة و اللي و اللي و هما فعلا بيوصفوا الفيل(أجزاء من جسمه بس) يعني نفس الموضوع بس من وجهات نظر مختلفة.بعدين ممكن علي نقطة معينة نختلف.حد ممكن يقول ان جلد الفيل خشن جدا و مليان متشقق,و بالنسبة لحد تاني يقول,انه ناعم و أكيد الاتنين صح,يعني يمكن اللي قال انه خشن كان لمس قبله جلد غزال و اللي بيقول انه ناعم كان لسة لامس جلد تمساح,فبالنسبة لجلد التمساح جلد الفيل ناعم,و بالنسبة لجلد الغزال هو خشن جدا.عشان كدة الواحد ميقدرش يقرر يشتري الا لما يشوف كذا شكل عشان يعرف الأجمل.ممكن شخص يحس ان بيته واسع جدا,بس بزيارة لبيت جاره يكتشف ان بالنسبة لجاره,بيته طلع كشك.نفس المشكلة لما تيجي توصف نفسك,لو كنت مشوفتش بشر قبل كدة هتقول,عندك عين و فم و ايدتين و رجلين,لكن وجود الناس بأجناس مختلفة و أشكال مختلفة حدد المواصفات أكتر.ممكن يكون شخص طويل في الفلبين,بالنسبة ليهم طويل,لكن ممكن يكون قصير بالنسبة للمصري,و يمكن قزم بالنسبة للأفريقان.مثال أخر للنسبية في العلاقات الانسانية,ممكن تكون بتتعامل مع شخص معين بأسلوب معين,لكن لو استخدمت الأسلوب ده مع شخص تاني هيعتبرها اهانة,أو لو جيت تكلم فراش بالعربية الفصحة ممكن يفتكرك بتسخر منه.و برده الهزار التقيل,بالنسبة للشخص نفسه ممكن يكون ده العادي بتاعه اللي بيتعامل بيه مع أصدقاؤه.لكن شخص لسة ميعرفهوش ممكن ينفر منه نتيجة لهزارة.
الكيلو و المتر و الساعة كلها وحدات اتعملت عشان يتقاس بالنسبة ليها الوزن و الطول و الوقت.و بالنسبة لدول تانية ممكن تكون بتستخدم وحدات تانية.
حاجة زي النسبية لازم ناخد بالنا منها عشان ممكن الهزار بالنس.بة لينا ممكن يكون جد لحد تاني,و خلي بالك من هزارك.
بالنسبة لي,مقدرش اكمل دلوقت,صداع "لحظة تحدي" لسة ملازمني!!
سلام

المش كامل

الموضوع نسبي,ممكن يكون بالنسبة لي موضوع معين مكتبتش جزء كبير من اللي كنت فكرت أكتبه,لكن بالنسبة ليك ممكن يكون كامل,يمكن لو عرفت اللي كان نفسي أزوده رأيك يختلف.بعدين لو جينا نبص علي كل حاجة في حياتنا هنلاقي ان عوامل كتير بتواجه الأفراد عشان توقفه أو تعطله او يمكن تنسيه حاجة كانت ممكن تخلي عمله كامل في وجهة نظره.رحت تعمل قهوة أو شاي,بس نسبة السكر ممكن تحسها أقل أو أكتر,حتي لو ده الكوب رقم مليون,مش بعيد تغلط أو متلاقيش سكر أو أو أو.بعدين "الكمال من عند الله" يعني المثالية في الخيال,صحيح بنحاول نسعي ليها بس مهما كنا قريبين من المثالية,منقدرش نحدد اننا فيها و لا لأ,يعني احنا كبشر غير كاملين,و قدرة ايدينا و عقلنا علي عدم ارتكاب أي أخطاء مش 100% و بعدين مادمت بتقرا الموضوع ده يبقي نظرك مش 100% نتيجة لجلوسك علي الكمبيوتر لفترات طويلة,ازاي باستخدام كل الحاجات اللي لم ترتق بعد للمثالية هتوصل للمثالية و تتأكد؟الخط المستقيم اللي ممكن ترسمه بمسطرة,مستقيم بالنسبة ليك,كامل بالنسبة ليك...بس لو جبت عدسة مكبرة أو مايكروسكوب,هتلاقي ان الخط,حوافه مش مستقيمة,لأنك لو عايز ترسم فعلا خطي مستقيم مثالي,محتاج ترتب الجزيئات جنب بعض و برده لو استخدمت مايكروسكوب اليكتروني(اللي تأثيره ممكن يكون وحش علي الخط,ممكن يبوظلك ترتيب الجزيئات),هتكتشف ان الجزيئات عبارة عن أشكال كروية,و سطحها عامل زي كور كتير مرصوصين جنب بعض,هل حواف الكور دي خط مستقيم؟يمكن لو ركبت طيارة و بعدت شوية تشوف الكور راسمة خط مستقيم.يعني كل ما نبعد,كل ما نحس ان اللي قدامنا مثالي,لكن كل ما ندقق و نقرب هنلاقي ان المثالية مستحيلة.بعدين لو كانت كل حاجة مثالية هتلاقي الحياه كلها اختلفت,قريت قبل كدة تحليل توصل ليه العلماء ان الاعتناء الزائد بنظافة الطفل و الهوس بتعقيم حجرته بتخليه مناعته أضعف من الطفل اللي معرض لباكتيريا و هو بيلعب في الطينة,ده لأن الطفل المعرض للباكتيريا مناعته بتبدأ تتعرف علي البكتيريا دي و تبدأ تأسس خط مناعي قوي,يعني في عدم مثالية نظافة مكان الطفل,تقوية لمناعة الطفل.لو شخص طول عمره ماشي في الطريق السليم,مثالي معملش اخطاء قبل كدة,مع أول خطا ليه,مش هتكون عنده خبرة كافية للتعامل مع نتايج الخطأ ده,علي الأقل مش هيكون زي اللي عمل الخطأ ده قبل كدة و اتعلم منه و درس طرق تفادي الخطأ ده.يعني بفرض ان واحد مثالي في حاجة,المثالية دي هتأثر عليه في حاجات تانية.يمكن لو مثالي في مهارة معينة تكون شخصيته مغرورة و متكبرة,أو مثاليته في مجال معين تمنعه من انه يخرج من المجال ده و يجرب في مجال تاني كان ممكن يبدع فيه اكتر لكن مثاليتة قيدته في المجال اللي هو فيه.يكفي اننا بنشوف تأثير الاعلام علي نجوم الغرب,نتيجة لاحساس الناس بانهم مثاليين,و في الوقع مش في كل حاجة,الاعلام بيحب يظهر فضايحهم,او يمكن حاجات بسيطة ,أخطاء.لكن نتيجة لشهرتهم بتتحول لفضايح.مهو لكل شيء ثمن,خدت مثالية؟خد ليستة الحساب,ممكن امراض نفسية,امراض شخصية(زي الغرور و التكبر و الكذب),ممكن أمراض جسدية,ممكن أمراض اجتماعية.بلد زي مصر,ايه اللي ممكن نعتبره مثالي فيها؟الأثار؟طب دي مثالية,ايه الثمن؟ارتكاز كل الحكومات علي فلوس السياحة و قلة اهتمامها بالمجالات الأخري.ادفع مليار في الأثر ده عشان تنقذه,فكك من انقاذ الشعب,الشعب هياكل من فلوس الأثر ده.بقينا بنبعت أثارنا في معارض دولية نشحت بيها.بقينا عظاميين,أكتر من عصاميين,الشعب نفسه بدأ يتأثر و يتحول الي شخص خامل و نتيجة لخموله بيقل نصيبه و يقل مرتبه نتيجة لضعف الاقتصاد,و يبدأ يقول انه مش بياخد حقه.ما علينا.ممكن أقول بلاد كتير ممكن تكون مثالية اقتصاديا لكن مع ذلك عندها مشاكل اجتماعية و نفسية أكتر مننا,منقدرش نقارن,لأن لو في مجال ضعيف عند دولة,ممكن تكون الأقوي علي مستوي العالم في مجال تاني.طب هل ممكن نوظف عدم المثالية في افادتنا؟ممكن,ليه لأ؟ممكن يكون لمبة نور بتفقد جزء من الطاقة المستخدمة في أمر مطلوب (الاضاءة)في أمر غير مطلوب (حرارة),بس في الشتا,هتحس بانك استفدت من الجزء الفاقد من الطاقة كمان.ممكن القمامة يعاد استخدامها عن طريق التدوير,بالرغم من انها مجرد قمامة,تم توظيفها مرة اخري و الاستفادة منها.ممكن تخلي النقص اللي عندك,أو اللي ممكن تسميه عيب,مصدر قوة ليك و الهام للناس.و ياما ناس تحدوا اعاقاتهم و عيوبهم,شوف انت الصحيح ممكن تعمل ايه.

لحظة تحدي

حياتنا كلها ليست الا لحظات...لحظات ننساها,ولحظات تدوم معانا العمر كله,لحظات تحيينا,و لحظات بتطعنا ألف طعنة,لحظات تفرقنا عن الطفولة و النضج.هل في في عمرنا لحظات صعبة؟هل ممكن نقول ان في في عمرنا أصعب اللحظات؟طب أصعب لحظة ممكن تكون ايه؟مش شرط تكون لحظة حزن,و لا لحظة ضغط...أكيد في لحظات كتير ممكن نعتبرها أصعب اللحظات,و ده اللي بحاول أطرحه عشان أترك لكم الحكم في النهاية لتروا بأنفسكم أصعب اللحظات.

___________________

"و كانت هذه القشة التي قسمت ظهر البعير!!",الجملة دي كانت خوفي الأساسي انهاردة,الموضوع اني كنت بقالي فترة معاهد نفسي ان مفيش شيء يستحق اني أحرق دمي عشانه...الصراحة أنا مكنتش عارف أسمي الموضوع لحظة انتصار و لا لحظة تحدي,عامة اللحظة كانت معظم اليوم و مازالت ممتدة لحد اللحظة اللي بكتب فيها دلوقت!!الواحد لما بيكون مرهق,بيشوف اللي يحرق الدم أضعاف الأضعاف.أنا كنت ماشي في الشارع,في رحلتي الطويلة للعودة للبيت.لو جيت أعدد المشاكل ممكن أقول انهم 4,
أول مشكلة اني جعان,رحت محل اشتري سادويتش طعمية زي العادة بس الطعمية بقت بجنيه و ربع,جيت أبص في المحفظة
تاني مشكلة,في جيبي 3 جنيه,صحيح يكفي ساندويتش و اجرة الميكروباصين اللي المفروض أركبهم,بس مقدرش أدخل من باب البيت بأقلل من جنيه,أقلها لازم أعمل حسابي لو حاجة طارئة.قلت بلاها طعمية خلينا في الحاجة الساقعة يمكن تفوق شوية و تسكت الجوع شويتين.
المهم بدأت المشوار بالمشي لتوفير اجرة ميكروباص منهم,مسافة طويلة و سهل تلاقي فيها ألف حاجة تعكنن عليا.كفاية تالت مشكلة.
تالت مشكلة, ارهاق شديد يصاحبه صداع المفروض متعود عليه ,لأنه عشرة عمر,بس مدرب الأفيون الطبيعي اللي بيفرزه الجسم علي التنفيض للصداع
بس المرة دي الجرعة كانت مش مكفية,كتر خير الأفيون انه مخففه علي اللي ممكن يكون.المهم فاكر ان شرب المياه بيعالج الصداع و يشبع,قلت اشطة في طريقي سبيل أشرب منه,بس استوقفتني رابع مشكلة.
رابع مشكلة,مزنوق و محتاج أدخل الحمام!!بس ايه المشكل؟ممكن أستحمل,و برده هشرب مياه,علي الأقل أكون حاولت أخفف الصداع و الجوع.
طبعا الخلطة اللي فوق دول بيخلوني أشوف الكأبة طريقي.يعني أعدي علي قهوة شاب سايب شنبه و دقنه مش محلوقين(اكيد خريج و عاطل!!) و أبدأ أقول,مسيري ابقي مكانه,بعدين أبدأ اقول ايه ده؟تلاقيه بكرة هتجيله وظيفة كويسة بس هو صابر علي هو فيه.و مسيري في سنة تخرجي مشاكل التوظيف هتتحل و مش هتكون مشكلة كبيرة بالنسبة لي(ان شاء الله)
بعدين كملت طريقي شوية,الاقيني بقول,"ناقص فعلا يطلع عليا حرامي و يلطش الاتنين جنيه اللي معايا يروح يشتري بيهم طعمية.بس هيكون سيء الحظ انه سرق محفظة شخص سيء الحظ زيي,و يمكن المحفظة تنحسه و لا حاجة!!ايه العبط اللي بقوله ده؟من امتي باؤءمن بالحظ؟مفيش حاجة اسمها حظ,كله ماشي بالقدر.بعدين يا مشاكل رخي رخي,مش هيأثر فيا لا صوتك و لا شكلك الشفاف,خليكي تنزلي الأرض,و لا هعبرك.
ماشي في الطريق و بغني و منفض للصداع,ايه ده؟انا عندي صداع و مش بعيد الغنا يزوده!!اشطة و ايه المشكل؟انا بيفرق معايا؟
وصلنا للمحطة الحمد لله و قدامي اكتر من 7 محطات و هحول في النص و بتاع.و طبعا بالصداع و الارهاق مش هصعب علي حد عشان يقعدني مكانه,انا كان كل أملي الاقي جنب الباب التاني فاضي عشان اقعد عالأرض.خط الجيزة منفعش,حولت و فضلت واقف بغني بصوت واطي لحد قبل محطتي بمحطتين,و قعدت عالأرض أخيرا,بل المحطة اللي بعدها قعدت عالكرسي!!صحيح كدة و كدة كنت هقعد في الميكروباص,بس فعلا القلق كله من الدوخة اللي ممكن تجر سطلان!!المهم ركبت الميكروباص,طبعا اللي بيخنق دايما انك تنزل عشان تنزل ناس,بس الحمد لله نزلت و انشغلت بالميدان أبو نافورة مردومة و مزروع فيها زرع,بس كان فيه حركة مختلفه,لتاني مرة في حياتي أشوف مولد,بس لأول مرة أشوفه في ميدان.ابتسمت ابتسامة كلها ارهاق,رغم كل مشاكل الناس,بيحتفلوا بالمراجيح عشان المولد النبوي.كمان شوية قلت للسواق يقف,وقف قبل المكان اللي المفروض أنزل منه بمسافة كبيرة,علي الأقل بالنسبة لشخص مرهق في حالتي المهببة دي,و بعدين يمكن أطول مسافة ميكروباص وقفها بعيد عن المكان اللي المفروض انزل فيه قبل كدة.و لو,و لا يهمني,و لا يهزني.مشيت و عديت و دخلت البيت,الحمد لله مفيش عكننة,علي الأقل لمدة ربع ساعة من دخولي البيت.صحيح,بدأت بس تفاديتها,و ليه لأ,منا قادر انتصر و انفذ اللي كنت مخططه.حتي اختي اللي عادة بتتمسك بالجهاز,وافقت تعطف عليا بنص ساعة أكتب فيها البتاع اللي بكتبه ده!بعدين,افتح الوورد باد و أكتب سطر,الاقيني بكتب لاتيني.و الله حصل كذا مرة خلال كتابتي الموضوع ده.بالمناسبة,في لحظة تحدي جاية قريب,يوم الاتنين كدة,ادعولي أفضل مستقر و متحصليش انتكاسة,النتيجة هتطلع, و بصراحة انا مش متفائل.
عامة,ربنا معايا و تكون في لحظة انتصار يوم الاتنين.
أسف لو اسلوبي اختلف أو في أخطاء املائية,اعذروني,و كفاية كدة عشان افتكرت اني محلتش المشكلة الرابعة لسة!
سلام

موقعة السيدات 2

مساء الخير أو صباح الخير .. كله على حسب المعاد اللي بتقروا فيه..

النهردة بجد طفح الكيل .. وصلت لدرجة من العصبية اني مش قادرة أقف على رجلي .. تخيل لما حد يشتم أختك واللا والدتك شتيمة مش كويسة؟؟

ممكن تعمل ايه؟؟ و رد فعلك حيكون إزاي؟؟

مش فاهمين حاجة!! ماشي نبدأ من الأول عشان نفهم للآخر...

من 3 شهور من ساعة ما عربية السيدات اتغيرت وبقت في النص والدنيا اتلخبطت عالآخر... عربية السيدات كلها رجالة .. قلنا معلش يمكن لسة ما يعرفوش ياعيني..

بدأنا نتكلم بذوق يا جماعة دي عربية سيدات .. يا جماعة العربية مكانها اتغير .. ولا حياة لمن تنادي

قلنا يمكن الكلام بتاعنا مش بيوصل لهم .. أو مش مفهوم بالنسبة لهم !!

طلعنا نشتكي للعواطلية اللي موجودين فوق (قلنا اهم رجالة يمكن يفهموا بعض).. ثبتونا بشوية كلام وخلاص على كدة !!

واستمر الحال على ما هو عليه

لكن لا يضيع حق ورائه مطالب... بدأنا ناخد حقنا بنفسنا ونزعق مرة ونطنش مرة .. ونسمع كلام بايخ ونعديه مش مشكلة

لكن انها توصل ان واحد يشتم بألفاظ بذيئة دي بقى قمة المسخرة وانتهاك الحق.. يعني راكبين معانا وبتقلوا أدبكوا لالالالا كدة كتير ....

كان لازم حد يقول لأ بأعلى صوته ..

بغض النظر عن الستات اللي بتبص باستسلام واللي مش فارق معاها حاجة واللي شايفة اننا ممكن نعتبرهم زي اخواتنا أو أبائنا..

المهم .. اللي حصل بقى النهردة كالتالي ..

ركبت المترو من محطة رمسيس عربية السيدات فقط (أصل في رجالة بتستعبط وتقول كل العربيات من بعد 9 مختلطة) لأ في عربية طول اليوم سيدات (دا للعلم فقط)

وبعدين بسم الله الرحمن الرحيم 4 رجالة ركبوا معانا قلنا عادي هوينين.. نتكلم معاهم براحة واكيد حيفهمونا ..

سبقنا الله يكرمه عسكري المحطة اللي كان لسة صاحي تقريبا من النوم.. وقالهم انها عربية سيدات واحد بس كان باين عليه انه حد محترم وقام واخد بعضه ونازل .. اما التلاتة اللي فضلوا تقريبا تخيلوا نفسيهم سيدات زينا زيهم ..

محطة ورا محطة والرجالة بتزيد والستات يا عيني بتتحشر في بعضها..

دخلت واحدة منقبة الله يكرمها وبدأت تقول بكل ذوق وهدوء يا جماعة دي عربية سيدات ومينفعش نبقى واقفين أكتافنا في أكتافكوا .. وبعدين دي عربية واحدة بس والباقي ليكو الحق تركبوها .. وبدأ النقاش .. كل واحد عنده كلمة بدأ يقولها ..

وفجاة لقيت قدامي اتنين تقريبا واحد منهم لواء والتاني نقيب (مفكرين نفسهم كدة ) و بيتكلموا بكل ألاطة

احنا ممكن نفضي العربية دي كلها ونفضل احنا قاعدين فيها.. أنا سمعت الكلمة وعملت عبدو العبيط وكبرت شوية كدة سمعت الصوت بدأ يعلى ببص الله دي خناقة بجد بنت بتتكلم وبتساند الأخت اللي اتكلمت في الأول قام شاب ظريف لطيف راح شاتم البنت شتيمة مش محترمة خالص .. الكلمة خرمت طبلة ودني وخلاص وقتها دي كانت القشة التي قصمت ظهر البعير..

استنيت المترو وقف في محطة الدقي والباب اتفتح و حضرة اللواء نزل ومعه سيادة النقيب مستنين الناس ينزلوا عشان يركبوا تاني.. وهما جايين يركبوا تاني ومش عاجبهم وبيقولو ما انتو بتركبوا عربية الرجالة والباب بدأ يقفل وهما بيركبوا فمسكوا الباب باديهم و ايدي وايد بنت كملوا 4 و قلت الرجالة كلهم ينزلوا فتكلم حضرة اللواء وقال تاني احنا نفضي العربية دي ونركب احنا لوحدنا.. وبدأت الخناقة من ناحيتي

وفضلت ماسكة باب المترو عشان ما يمشيش وقلت المترو مش حيتحرك الا لما ظابط المحطة ينزل والسواق يجي و كل الرجالة تنزل!!

وكبرت في دماغي.. وصوتي كان أعلى منه مفيش .. الغريب اني قلت انه مفيش راجل حيسمح على نفسه انه في بنت تزعق له ويفضل واقف في العربية .. الدر اللي صعقني بقى احنا مش رجالة!!!! فعلا الرجالة ماتوا في الحرب.. دا كان ردي

المهم فضلنا على الحالة دي حوالي 20 دقيقة وكل اللي في العربيات اللي حوالينا من الرجال طبعا داخلين فينا شمال انتوا عايزين ايه؟؟ انتوا معطلينا والغريب بقى والأعجب انه كان في سيدات بيزعقولنا كمان.. حاجة تشل.. طيب يا أختي انتي متنازلة عن حقك في غيرك مش متنازل عن حقه.. كفاية بقى اهانات لحد امتى حنفضل نتلطش على قفانا واسكتين .. قولوا مرة لأ..

وبالرغم من الزيطة دي ما زال عنصر الرجال متواجد في عربية السيدات(والله معندهم دم)

وانا دمي غلي كمان وكمان .. وأصريت أكتر وأكتر أصل خلاص بقى واحد يشتم بنت بطريقة زي كدة يبقى خلاص المرة الجاية نتضرب.. وملناش حق نتكلم ما احنا اللي أهملنا ..

كل ده ولسة الرجالة موجودة والباب بيقفل ويتفتح علينا .. واحنا واقفين انا والبنت اللي كان صوتها مقوي صوتي .. وفضلنا على كدة لحد ما الأخوة العاطلون اللي فوق نزلوا ونزلوا كل الرجالة اللي في العربية .. وكان انتصارا عظيما..

بس أكيد بكرة حترجع ريما لعادتها القديمة..

ويبقى انت أكيد أكيد في مصر..

موقعة السيدات1

و الله كنت فاكر انهم ساكتين و محتاجين قاسم أمين تاني يدافع عنهم بس صراحة طلعوا ب100 راجل
الموضوع و بصريح العبارة عن عربية السيدات في مترو خط المرج الجديدة حلوان.بعد تغيير موقع عربيات السيدات,اتخذها الرجالة حجة لركوب عربيات السيدات.و بعدين ممكن تلاقي ست ركبت عربية السيدات و معاها راجل,قال يعني عشان محدش من الحريم هتقدر تنطق,مهو معاه محرم!المهم أنا مكنتش راضي عن الموضوع ده,ازاي رجالة و يركبوا مع السيدات,يعني ايه؟هي سايبة؟فين عسكري المترو؟نايم في انهي داهية ده؟
المهم لو مفيش شرطة مترو تلم اللي ميتلموش,في الرجالة اللي ممكن تلمهم.بس,محدش بيعمل حاجة...قلت أعمل أنا.
أول يوم ركبت عربية"السيدات حتي الساعة التاسعة"و أما بسيط من الشباك الزجاجي اللي بيفصل بين عربيتي و عربية السيدات لاحظت 3 شباب واقفين و باقي العربية حريم.قلت يمكن غلابة مبيعرفوش يقروا و يكتبوا,صبرت لما جت محطتي و نزلت أكلمهم.
أنا:علي فكرة يا شباب,دي عربية سيدات
شاب:و الله؟
أنا:أه
الشاب:لأ برافو عليك
هنا بقي ينزل خبير الجرافيكس بمؤثرات بصرية, دخان بيخرج من وداني و وجهي بيحمر من الغيظ.و الصدمة تسكتني.
"لأ برافو عليك"؟؟؟؟
اذن فهي الحرب تفصل بينك و بيننا يا اهبل يا معتوه,اللعنة علي المترو.
بدأت اليوم التالي أبحث في أفضل وسيلة لتوصيل المعلومة...معلومة ايه؟هما عمي؟دول رجالة ناقصة!!يبقي الموقف هيكون هجومي من ناحية باب المترو و أكيد المترو هيقفل بابه و يمشي قبل أي رد فعل هجومي منهم...يبقي علي الأقل أحرجتهم
"والله ما في في العربية دي رجالة"كانت الهجمة الأولي و بالفعل تم تنفيذها,صحيح منزلوش و بدلوا عربيات,بس علي الأقل,هيراجعوا نفسهم و يخلوا عندهم دم المرة الجاية.
المهم الهجوم التاني,اللي لسة متنفذش كان اني أقول حاجة تخلي الحريم اللي في العربية تضحك عليه,و كفاية عليه كدة,الستات هتبصله و تضحك علي تعليقي,و هو هيكون في نص هدومه لو مبدلش العربية.
المهم أنا كنت بفكر في الموضوع ده بقالي كام يوم و حاسس انه هيكون قصير هنا,بس حالفني الحظ انهاردة اني أتلقي من مراسلتنا في عربية السيدات خبر موقعة قامت المراسلة بقيادتها.

هي اللي انقذتهم مني,كنت هسأل ازاي مبيدافعوش عن نفسهم و..و..و..بس بجد أنقذتهم

لحظة تأمل

حياتنا كلها ليست الا لحظات...لحظات ننساها,ولحظات تدوم معانا العمر كله,لحظات تحيينا,و لحظات بتطعنا ألف طعنة,لحظات تفرقنا عن الطفولة و النضج.هل في في عمرنا لحظات صعبة؟هل ممكن نقول ان في في عمرنا أصعب اللحظات؟طب أصعب لحظة ممكن تكون ايه؟مش شرط تكون لحظة حزن,و لا لحظة ضغط...أكيد في لحظات كتير ممكن نعتبرها أصعب اللحظات,و ده اللي بحاول أطرحه عشان أترك لكم الحكم في النهاية لتروا بأنفسكم أصعب اللحظات.

___________________

أوقات كتير الواحد بيحس ان في زحمة في دماغه,مشاكل بتواجهه من كل ناحية(أو يمكن بيتخيل كدة) و بيحس انه محتاج وقت,مجرد وقت,يترمي علي السرير ميتحركش,مش لازم ينام,مش لازم يفتح التلفزيون,مجرد يثبت,أو حتي يقعد قدام الكمبيوتر مش بيعمل حاجة,يمكن بيسمع اغاني بس....
نفسه ياخد أجازة,مع انه فعليا هيأجل حاجات,هيراكمها لحد ما يخرج من الأجازة,و للأسف لما بيخرج من الأجازة دي يحس انه عايز أجازة تانية,لأن الحاجات اللي سابها بقت خمس أضعاف ما كانت عليه قبل الأجازة,مش زادت في نظره لأنه خارج من أجازة بس,لأ دي زادت عليها حاجات تانية.عشان كدة ممكن تكون لحظة التأمل أصعب اللحظات,و يمكن أخطرها,لأنك بتضحي بحاجات عليك انك تعملها دلوقت,هتتراكم عليك...في مقابل اللحظة دي.طب ليه هي أخطر اللحظات,و هل ليها فايدة؟مهو لازم أكون عارف الحاجة اللي بدفع ثمنها تراكم حاجات عليا,يعني,الواحد محتاج يعرف مصلحته فين.بس لحظة التأمل دي مش بيكون قبلها حسابات,مش دايما,يعني ممكن حد يتخذها قرار كدة بدون دراسة,و يمكن يقول محسش بقيمة اللحظة دي,أو ممكن يكون شايف ان اللحظة دي هتديله فرصة يشحن طاقته الجسدية و المعنوية و الروحية,و يفرغ شحنة التوتر و القلق و اليأس اللي عنده,و مع ذلك ده مش دايما بيتحقق له اللي بيسعاله في اللحظة دي.صحيح ينصح بان الواحد يوفر لنفسه وقت يرتخي علي السرير بدون أي هدف,يمكن يراجع أحداث الأسبوع,و يتأمل أحداث معينة و يراجعها و يحللها,ممكن يعمل حساباته للمستقبل...و يمكن يفتكر ذكريات الماضي.أكيد في الحاجات دي مش دايما هيلاقي راحة نفسية,يعني يمكن أحداث حصلتله تبوظله اللحظة,يمكن يكون متشائم من المستقبل نتيجة لسوء الحاضر فبرده يزيد اكتئابه,و ممكن يفتكر ذكريات كان حاول يمحيها لكن مقدرش.دي مشكلة أو خطورة اللحظة,ممكن تدفعك للتفاؤل و اللي بدوره هيديك أمل في الحياه و يخليك تبدع في عملك,و تنشر الطاقة الايجابية فيمن حولك,و ممكن تدفعك للاكتئاب و اليأس و انعدام الأمل في مستقبل أفضل,و ده بقي اللي بيكون أكتر خاصة في حالة الشعب المصري,اكتئاب و يأس و تشاؤم و تنفيض.أنا عانيت كذا فترة من الموضوع ده...حاجة زي قصيدة المنسيين-200 بيت- بعد ما انتهيت منها,حسيت ان كان أفضل لي اني متأملش في حال الناس,و أعيش حياة التنفيض اللي عايشها أغلب الشباب.بس بعد فترة حسيت انه مش صح اني متأملش لكن الصح اني أتأمل بدون مبالغة(بدون أوفرلود) عشان متأثرش سلبيا,بعدين يكفي النظر للعشر المليان من الكوب,حتي و لو نقطة مياه واحدة ,تكفي.بس هل كدة صح؟هل ده تنفيض؟ناس قالوا اني كدة غير واقعي,بس أنا شايف انه واقعية,لأن في الحالتين أنا بظهر رد فعل لحاجة موجودة قدامي(واقع) حلوه بس أو مره بس مش مشكل,يعني نقطة المية موجودة و برده الجزء الفارغ من الكوب برده موجود,بعدين مش مشكلة ان كان الجزء الفارغ عبارة عن هواء من عوادم سيارات القاهرة,و قش ارز القاهرة الكبري,و حرارة و رطوبة و قرف الصيف في مصر و اللي بيشكلوا خلطة من الأمراض الصدرية اللذيذة,و مش مشكلة لو نقطة المياه جت من نيلةالقاهرة(مهو عند القاهرة بيكون خلاص بقي نيلة)و فيه نسبة من كلور التنقية و نسبة من مياه الصرف المتسربة و اللي بيسببوا فشل كلوي و تليف للكبد و ما الي ذلك من الأمراض الصديقة."لذيذة" و "صديقة" لأنها بقت زي المصري و جزء منه كمان,عشرة عمر.بس لو انت مقضيها الدنيا بمبي مش هتحس غير بجمال نقطة المياه في الكوب,و لو راجع من المصلحة اللي وشوش موظفينها نسخة من طبق الأصل,بالفم المقلوب و تجاعيد القرف,و ركبت الاوتوبيس الحكومي و راجع متعدي من الناس,هتبص للكوب و يمكن تمسكه و ترميه من الشباك.
(تحذير:هذا قد يؤدي اللي جناية لو سقط كوب الماء علي شخص لحظه العاثر,يمكن كان بيتأمل, و مات متأثرا بجراحة...أنا غير مسئول عن أي شخص قام بهذا العمل متأثرا بتلك المدونة)
طب و بعدين؟اللي عايز أوصله ان طول مأنت مخرج نفسك في لحظة التأمل من أي طاقات سلبية,هتنجح في اخراج الطاقة الايجابية اللي جواك.
و ماله الجو حر؟طب مهو في اوروبا بيتمنوا ربعه؟
و ماله المياه فيها أمراض؟ مهو في البلاد اللي فيها مجاعات ممكن الواحد يبيع هدومه عشان فنجان(و لا فنجال؟) من مياه الحنفية؟
و ماله الهواء ملوث؟طب مهو في مدن أمريكية و هندية الهواء عندها دايما له ريحة نتيجة لدخان المصانع اللي عندهم؟
و ماله الشغل فلوسه قليله و لا مش عاجبك؟طب مهو في ناس مش لاقية شغل تاكل منه؟
و ماله عاطل؟مهو في ناس كتير نفسها تقعد علي القهوة و تقرا جرنال و مقروفة من شغلها؟
و ماله لو ليلة توهنا بعيد و سيبنا كل الناس,أنا يا حبيبي حاسس ب"بلوج" جديد ماليني ده الاحساس......
و ألقيكم في لحظات أخري ان شاء الله

أنا بنطلون

أحب أعرفكم بنفسي,أنا بنطلون جينز عادي,زي أي جينز بتشوف الناس لابساه...مصري,مش بلد المنشأ أكيد,لكن ده جنسية اللي شاريني و لابسني و هاريني.أنا ياما قابلت جينزات و ياما اشتكيت و سمعت شكاوي,احنا فعلا حالنا وحش...
أوقات كتير البنطلون مش بيكون عارف يحتوي اللي لابسه,بيكون خايف لا يتقطع...و يتحول لحتت خرقة بيتمسح بيها الأرض.و أوقات تانية بقابل بنطلونات بتكون واسعة لدرجة انها بتخطط تتسلت من وسط اللي لابسها,بس حظهم مبيساعدهمش,ديما يا اما الشخص اللي لابسهم ماسكهم من جيوبهم يا اما الأندر وير مش مستعد ينكشف كله فبيمسكهم,بس ايه يعني؟اذا كان الشخص سايب الأندر وير باين نصه,ميسيبه كله بقي؟بالمناسبة,في اختراعين اتعملوا عشان نتمسك,في الحزام و في الحمالات.بعدين أوقات كتير البنطلونات بتحزن ان بنات محجبات لابسينهم ضيقين,يعني البنطلون الجينز بيحس انه مش في المكان المناسب,تحزيقة ايه اللي تخلي بنت محجبة تستخدمه فيها؟لأ و الشباب بقي فعلا غريب,بقي يوسخنا و يسمينا وسخين(ديرتي) و قال ايه موضة!!أو يسيب رجلينا تتقطع و تتوسخ و تتطين و كله فدا المنظر الكول و الروشنة,حرام عليكم احنا ولاد قماش مش رخيص عشان نتبهدل البهدلة السودة دي,و بعدين بأي حق يتكتب علينا بالجاف و الحبر و لا نتقطع و نتساب متقطعين؟طب الرفا اللي تحت البيت ده يكسب منين و كل واحد قاطع البنطلون بتاعه و منفضله؟بعدين احنا كنا بنستر,ايه اللي جرالنا؟أنا خايف في يوم أتقصر و ابقي بنتاكور و بعدها شوية كدة و اتقلب شورت,و يمكن يكون مصيري في النهاية شورت ساخن و العياذ بالله!!
بعدين أنا ببهت,يعني الورقة اللي متخيطة فيا يقولوا فيها ايه عشان تفهموا انكم لازم تغسلونا مقلوبين عشان اللون ميروحش؟
اعتراض أخير,أنا شايف اننا أريح بكتير من لبس البدل,يعني لو قانون العمل حط حدود أقل علي اللبس,مش لازم يكون رسمي يعني,احنا كلبس كاجوال نسهل عليك قعدة الشغل لساعات علي المكتب,الي جانب الكرافتة اللي ملهاش لازمة.

شارع الحياه

الحياه عبارة عن شارع طويل,ممكن نقول انه زي شارع من شوارع مصر...بوديانها و هضابها و شروخها و أوقات تلاقي حتت متكسرة و حتت مش مرصوفة, و بلاعات مفتوحة,و عيال تجري قدامك من هنا و ناس و هي بتجري تخبط فيك.و برده بيكون فيها ألف تقاطع.بيكون ليك فيها مطلق الحرية تختار أنهي طريق تدخل فيه.و دايما الطريق للقمة مايل لفوق بزاوية,مطلع يعني.بيحتاج دايما لمجهود عشان تمشي عليه,بعدين ممكن تغير مسارك منه و برده في الطريق للسفح عبارة عن منزل,مش بيحتاج غير لمجهود انك تتفاداه و لو وقعت منه محتاج مجهود انك تطلع منه و تكمل في الشارع المستوي,و لو استسلمت,هتفضل نازل,و انت و حظك يا اما حد من صحابك أو معارفك يلحقك قبل متتدحرج و متعرفش تقف,يا اما نقول عليك يا رحمن يا رحيم.و انت ماشي بتقابل ناس و تفارق ناس,و تشوف ناس من وقت للتاني,و اللي يغيب كتير و يرجعلك,و اللي ميرجعلكش,و اللي تفتكره عزيز و يشنكلك,و طبعا خلال مشيك ممكن تقابل ناس طريقهم مختلف,بس بتفضل علي اتصال بيهم,قرايب و أصدقاء و زمايل.بعدين الواحد مش بيمشي في بعدين بس(في جهة من الجهات الأساسية) و لا تلاتة أبعاد بس(لو ضيفنا ارتفاعة عن مستوي القاع) و لا حتي أربعة(بفرض اننا ضيفنا الوقت كبعد رابع,معلش الهندسة بتأثر برده)....عدد الأبعاد بيكون هو عدد أهدافك,يعني ممكن تكون بتمشي في كذا بعد و انت مش واخد بالك.الكارثة بقي لو ان مش عارف تحدد لسة أهدافك,ساعتها ممكن تمشي تايه كدة من غير خريطة,و ممكن تفضل في مكانك,مش بيحركك غير تخبيط الناس فيك,ده يزقك من طريقه و ده يتكعبل فيك,منتا واقف في طريقهم.بالنسبة للمطبات و الحفر و البلاليع(دلع بلاعات) ممكن تقع فيهم و انت مش واخد بالك,ده أمر طبيعي,بس في اللي بيكون عامل حسابه,و ده بيكون نادر جدا.بس لما بتقع,مينفعش تقعد تبكي علي رجلك اللي اتجزعت و لا ركبتك اللي اتجرحت و لا كوعك اللي بينزل دم,لازم تقوم تكمل,متستناش حد يقومك,لأن مش دايما هتلاقي صحابك موجودين عشان يسندوك.بعدين حتت انك كل ما تتكعبل تقف شوية مش هتنفعك,بل ممكن تأخرك عن أهدافك أو حتي تنسيك كنت رايح في أنهي اتجاه,أو حتي ممكن تغير اتجاهك تماما,طبعا انت بايدك القرار,ممكن تخلي الوقعة تكسرك,و تنزلك في المنزل,و ممكن تخليك تطلع علي المطلع,علي أمل انك تلاقي مطبات أقل فوق,و بالمناسبة,ممكن يكون الطريق فوق بنعومة الرخام,بس الطلوع ليه بيحتاج مجهود أكتر.بعدين "الاحتفاظ بالقمة أصعب من الصعود للقمة" يعني صحيح فوق الشوارع رخام,بس تخلي بالك من الزحلقة,أوعي و الزحلقة!!لأن لما تتزحلق للطريق اللي كنت فيه في الأول هتحس فعلا بالفرق,مهو الواحد مش بيحس بقيمة حاجة الا لما يفقدها,يعني هتحس ان فعلا الرخام كان أنعم علي رجليك و الجزمة تحت بتتبهدل أكتر من فوق.بعدين خلي بالك,لأن القمة مش في مكان واحد,لأ,ده القمة في كذا اتجاه,حسب مانت ماشي,في قمة المال,و قمة الصحة و قمة النجاح في مجالك و قمة الايمان, و كل ما كان عندك ايمان في نفسك كل ما حسيت ان الطريق للقمة سهل و التضحية ليه مش هتكلفك كتير,و لما بتوصل للقمة,كل ما زاد تمسكك بالقمة كل ما استمريت فوق.بعدين فوق,حسب القمة اللي انت عليها,بتشتهر بقمتك.و كذلك لو وصلت لحفرة من الحفر العميقة,هتتعرف بحفرتك,و يا سلام لو كنت فوق و نزلت لتحت هتبقي أشهر من نار علي علم.بعدين سواق ان كنت علي قمة أو في قاع لازم هتنزل للسفح في يوم من الأيام,حتي لو في الشارع الرئيسي,هتنزل في القاع,ده بيحصل وقت الموت,كله بينزل للقاع,ان كنت مت في قصرك بتعد فلوسك أو مت بجرعة زيادة من مخدر في غرزة تحت الأرض,هتنزل للقاع,المكان الأخير واحد.مش مهم كنت فين,المهم عملت ايه هناك,يعني ممكن الناس يقولوا انك كنت علي قمة كذا,كنت أغني رجل في العالم,و لا كنت أغلي لعيب كورة,و لا اسطورة في الغناء,و لا أفضل داعي أو شيخ,لكن انت عملت ايه في قمتك,و هل فعلا القمة اللي طلعتها دي تستحق كل المجهود ده؟طب لما طلعت القمة دي مفكرتش تروح لقمم تانية عن طريق الكباري اللي بين القمم؟مهو ممكن تكون الأغني,و تقرر تنتقل لقمة الايمان و تفضل الايمان علي المال,مهو انت ملك قرارك.و ممكن تضحي بقمة التدين و تروح لقمة الفن,برده حر,بس لو رحت فين,هتتحاسب.بعدين لو جينا نبص علينا من ساعة ما بنتولد,الوالدين بيشيلونا و هما ماشيين أين كان الاتجاه,و تكبر و تمسك ايديهم و تمشي في طريقهم,يمكن يشدك ناس و تعجب باتجاههم بس مازلت محكوم باتجاه الوالدين.بعدين تبدأ تكبر و تنضج فكريا و تحس بالمسؤلية,و تحدد اتجاهاتك في الحياه,و أولوياتك,أيه هي أهم جهة بالنسبة ليك.و تمشي من تقاطع لتقاطع,و مش دايما تقدر ترجع للتقاطع عشان تغير اتجاهك,مهو في زي بوابات المترو كدة,اللي بيعدي منها ميقدرش يرجع في الاتجاه المعاكس.عشان كدة لازم تاخد شوية وقت تقرر فيه اتجاهك لفين بالظبط.طبعا مشاركتك لصحابك في هدف واحد بيشجعكم انكم تمشوا في اتجاه واحد,لو حد منكم وقع أو اتأخر بتشدوه معاكم,مهي هي دي الصداقة.بعدين ممكن تسيب ناس لأختلاف الأهداف,مهو مش دايما الحياه عسل و زبادي في الخلاط.دي شارع طويل فيه الحلو و المر,المهم تحدد اتجاهك,قرارك بايدك.

شبهو في المصيدة

هو ممكن تخيل يتحول لحقيقة؟يعني لو حد تخيل قصة,هل ممكن تحصل؟
كان جه في بالي قبل كدة ان ممكن يكون ليا أخ توأم و أنا مش عارف(زي الأفلام الهندي كدة) و تخيلت قصة فيها بيرتكب جريمة فيشتبهوا فيا و بعدين أما يفهموا سوء التفاهم و يخرجوني أقابله في السوبرماركت و لا حاجة.
ممكن اعتبره خيال طفولي أيام ما كان خيالي خصب و طفولي.بس لما كل شوية ألاقي حد يقول في حد شبهي,لحد هنا و أقف بقي!!في ايه؟كلكوا شبهي و لا ايييييه؟
ماشي,حاضر أديني ههدا أهو و هحكي اللي حصل.
في يوم من أيام أجازة الصيف,كنت راجع و معايا الطلبات,اذ فجأة شاب أكبر مني بسنتين و لا حاجة,شاب في الجامعة يعني(كنت ساعتها لسة في ثانوي)
سلم عليا و قاللي "انت مش أخو أحمد برده؟" قلتله اني وحيد مليش اخوات ولاد.فضلنا يقول اني شبه أخويا أوي و انا أقول أنا مش أخو أحمد,كمان ربع ساعة و كنت هقتنع فعلا بان الشاب ده صاحب أخويا أحمد...الا هو اسمه أحمد؟
عدي الموقف و اتنسي,و بدأت دروس و في أول يوم ليا في درس عند بيت واحد معرفهوش,حد من اللي هياخدوا الدرس قاللي,"أنت هيثم؟أنت هيثم!!" و من ساعتها و أنا بقي اسمي هيثم!!بسبب تشابهي مع شخص معرفهوش اسمه هيثم.....و زمن عدي و فات و كبرت و دخلت الكلية,سنتين كدة و في مرة كنت بسلم علي شاب كنت أعرفه بس دخل قسم تاني,و كان معاه شلة,حد منهم فجأة يقوللي"انت اتصالات؟أنا أعرف واحد شبهك شكلا و صوتا و شخصية في قسم كيميا",طب شكلا و صوتا ماشي,بس هو لحق يتعامل معايا عشان يلحق يعرف شخصيتي؟ما علينا(يمكن يقصد حركات جسمي اللا ارادية أثناء الكلام)الموضوع عديته بمزاجي.أجازة الصيف جت و تربية عسكرية و بتاع,في يوم كنت خلصت تدريب و رايح الحمام أغير هدومي ,شخص معرفهوش معايا في التدريب باين عليه لسة في أولي و لا حاجة بيسألني "ليك أخ في أولي اتصالات؟"هنا بقي قلتله"ايوااااا,تعالي هنا بقي,اسم اللي شبهي و سنه و عنوانه!!" و خدت اسمه و اسم شهرته علي أمل اني أدور عليه و الأقيه و أشوفه.الصراحة لحد دلوقت معايا اسمه و مفكرتش أدور عليه.نفس الأجازة كنت بضيف كليبات مصورة ليا عالنت كمدونة مصورة,المهم لاقيت تعليق لواحدة بتقول اني شبه أخوها,بعت ليها رسالة بطلب منها أشوف صورة أخوها,بس للأسف نفضتلي.من كام يوم حد من زمايلي في الدفعة جه بيقوللي,"الحق ده في حد معانا في الدفعة شبهك",بس أنا متربي مع الدفعة دي سنتين لحد دلوقت,يعني سنتين و مشوفتوش؟يبقي أكيد مدبلر,فسألته ان كان مدبلر قاللي فعلا انه مدبلر.يبقي في واحد في كيميا و واحد في الدفعة اللي بعدنا و واحد في دفعتنا!!ده حصار ده و لا ايه؟الموضوع بقي فعلا ممل,بقي في أوفرلود,أنا ليا نسخ كتير ليه؟بلاش,أنا خلقتي دي منتشرة ليه؟طب أنا لما كان شعري طويل زي الممسحات اللي بشوفهم كل يوم دول ,محدش كان بيقول اني شبه حد يعرفه ليه؟
اللذيذ اني لحد دلوقت مشفتش نفسي,أو شبيه ليا,كله بالسمع بس.بعدين أنا ليه عايز أشوف اللي شبهي دول؟سؤال وجيه...يمكن حب استطلاع؟شيء ممتع اني أشوف حد شبهي؟أو يمكن عشان أتأكد انه مش أخويا؟طيب فرضا شفته,هتصاحب عليه؟فليكن,بعدين يعني؟أنا اليومين دول بقيت بفكر ان كنت أنا أفضل واحد فيهم و لا حد أفضل مني,طبعا الأفضلية بالنسبة لي في الأخلاق و يمكن الشكل.
و الله أنا صديقي مجدي في شبه بيني و بينه,في الشخصية و في البرج,بس مفيش توافق تام في الشخصية,كل واحد برده له شخصيته و صفاته اللي تخصه و كذلك الخبرات,يعني يمكن الاختلافات أكتر من التشابهات,و يعتبر زي أخويا أحمد اللي مشوفتوش.يعني ممكن أنا و شبيه نكون نفس الوجه بس كل واحد له ميوله الخاصة و أسلوب حياته,و يا عالم ممكن يكون رد فعله ايه لما يقابلني...ممكن يقول عليا شكلي وحش(مهو الواحد شكله مش مألوف بالنسبة له خارج المراية)
طب أنا والدي اكتشف ان في ليا قريب في دفعتي,حاولت أقابله في مرة و أتضح لي انه مش بيتجاوب,يعني أنا قريبه,طب و
ايه يعني؟صحيح رد فعل يصدم بس أعمل له ايه,هو حر,له حياته و صحابه,مش محتاج قريب غلس يقتحم عليه حياته,و بنشوف بعض و لا أكني كلمته قبل كدة.اللي أقصد أوصله لنفسي قبل ماوصلهولكم اني مش لازم أهتم برد فعل اللي شبهي ده,أصل فعلا هيعمل ايه لما يبقي شبهي؟طب أنا شبهه,نبقي أصحاب يعني؟و لا أدور عليه لما ملاقيش مراية؟بعدين مش بعيد لما يكتشف انه له شبيه يرتكب جرايم و يحط في حسابه انه بكدة ممكن انا اللي ألبسها...و يمكن ساعتها لما يلاقوني يقولوا"امسك شبييييييييه"
و ربنا يستر

ازاي تقتل من غير ما تتقفش؟

أنا بطبعي بحب التجربة, بعمل حاجة أو أسأل سؤال أو أخلق موقف عشان أشوف رد فعل الناس,مرة دخلت علي الياهو أنسرز,للي ميعرفوش ايه ده,ده خدمة تبع الياهو زي منتدي كدة بس بتضيف سؤال و الناس تجاوبك,يعني موقع كدة تسأل فيه اللي انت عايزه.أنا فكرت لو مجرم او قاتل حب يقتل و ميتقفش و فكر يضيف سؤال:"ازاي اقتل من غير مأتقفش؟"هيكون رد فعل الناس ايه عليه.بصراحة توقعت ان الناس هتهاجم مجرد تفكيري في اني أقتل شخص و يقولوا انه حرام و غير قانوني و..و..و..لكن رد الفعل كان حاجة تانية خالص.وصلني 10 ردود تراوحت ما بين الردود الفكاهية و الردود اللي بتعتمد علي خبرة اكتسبوها من مسلسلات التحقيقات الجنائية و الاف بي اي.يعني من الردود الفكاهية,"اديله سجارة بانجو و زقه من الشباك و قلهم انه كان عايز يجرب يطير"و كان في برده"يا سيدي انت بس خليه يمل حتي الموت.أو حتي خليه يضحك حتي الموت,الاتنين هيجيبوا نفس النتيجة".بالنسبة للردود الجادة "ممكن تروح بالعربية في حتة مروحتهاش قبل كدة و ملكش أي صلات بيها و تخبط أي حد معدي في الشارع بالعربية و طبعا النمر متبقاش موجودة." و في اللي قال"يا سيدي أنا شفتلك قبل كدة في مسلسل التحقيق الجنائي واحد اتقتل عن طريق سيرنجة مليانة هوا و لما الهوا يوصل للمخ عن طريق الدم هيموت.و دي طريقة فعالة,بتبان طبيعية و مش سهل تتعرف انها جريمة قتل أصلا."بصراحة مش فاكر باقي الأجوبة لأن اليوم اللي بعده قام مشرفين الياهو أنسرز مشكورين بحذف السؤال.يمكن الناس لما قروا السؤال شافوا انه مش من المنطقي ان شخص ناوي يقتل يقول عالنت انه هيقتل.و يمكن شافوا ان الموضوع مجرد تسلية,بس لو فعلا شخص كان ناوي يقتل سأل السؤال ده,أظن انه كان هيستفيد من الموقع ده.
بالنسبة للقتل في مصر فالموضوع مش صعب.خد عندك الليستة دي,معاك ورقة و قلم؟اكتب بقي:
1)بلاعة الشارع اللي الضحية ساكن فيه
2)لو مفيش بلاعة دور علي عمود نور بسلك عريان أو بدون غطا قريب من بيته,مش هتغلب يعني
3)دور علي مطعم يكون نضيف,في موسم مفهوش زباين كتير,الأكل عندهم هيبقي عفن و صدقني هيجيله تسمم,بس ركز علي طلبية السمك,لأن التتبيلة بتاعته بتضيع أي ريحة أو طعم عفونة
4)أقولك؟ممكن ترميه من فوق كوبري أكتوبر,بس تكون عربيته علي الكوبري جنب المكان اللي هترميه منه,هيتقال انه انتحر بسبب ضيقه من زحمة الكوبري,و يمكن اللواء عاصم هيدردش في موضوع صاحبك ده شوية في الراديو و يبقي اسمك شهرته انه اتقال اسمه في الرادو.
5)ممكن برده تخليها فيها شبهة انتحار بانك تقتله بسكينة و لا مخدرات جرعة زيادة و تكون مخليه كاتب قبلها في ورقة"أنا عاطل" هيعتبروها رسالة انتحار
6)وقفه في طابور عيش و علي قفاه ورقة مكتوب عليها "كل اللي ورايا بهايم"
7)ميزة طريقة الحقنة اللي مليانة هوا انك مش محتاج تشتري حقنة,ممكن تلاقيها مرمية في الشارع أو قريب من مستشفي,أنا عن نفسي من وقت للتاني بلاقي سيرينجة في الشارع!!
بعدين ليه تقتل صاحبك مادام ممكن تنتقم منه بالتعذيب؟خد عندك في ضهر الورقة اللي كتبتها.
1)ادخل باسمه علي النت,أو بحسابه علي أي منتدي أو برنامج شات و افضل سب فالريس و ابن الريس و قول انك اخواني و دافع عن الاخوان بكل تعصب,متنساش تستشهد بشوية ايات قرانية و أحاديث و أكيد مضمون كلامك بالعربية الفصحي.صحبك هيختفي بتهمة سب و قذف و انقلاب و عضو في جماعة محظورة و كلام مفيش منه خروج.
2)لو الضحية حرمة ممكن تخرجها في يوم نهائي كاس الأمم بعد الماتش و تسيبها,ان شاء الله يا هتخرج حامل يا ميته.
3)ممكن تخلي الناس تضرب الضحية بانك تعمل شبه فتنة طائفية,مش مهم يكون الضحية من نفس دينك و لا لأ,ممكن تقول انه عايز يحول و شتم في دينك.
4)طلعها في دماغه انه يروح يقدم شكوي في وزير و لا محافظ لسيادة الرئيس,صدقني مش عايز تعرف اللي هيحصل فيه,يكفي انه هيختفي.
5)طلعها في دماغة يكون في طليعة مظاهرة من مظاهرات الاخوان,الأمن المركزي هيقوم بدورة و يديله في دماغة,ان شاء الله ارتجاج.
و في النهاية أحب أقول"ان صبر القاتل عالمقتول,هيموت لوحده" أصبر بس عليه شوية يمكن يخبطة سيرفيس و لا بلاعة تبلعه و لا حتي يموت من الكبت بسبب ارتفاع الأسعار.سيبها علي الله

لحظة قرار

حياتنا كلها ليست الا لحظات...لحظات ننساها,ولحظات تدوم معانا العمر كله,لحظات تحيينا,و لحظات بتطعنا ألف طعنة,لحظات تفرقنا عن الطفولة و النضج.هل في في عمرنا لحظات صعبة؟هل ممكن نقول ان في في عمرنا أصعب اللحظات؟طب أصعب لحظة ممكن تكون ايه؟مش شرط تكون لحظة حزن,و لا لحظة ضغط...أكيد في لحظات كتير ممكن نعتبرها أصعب اللحظات,و ده اللي بحاول أطرحه عشان أترك لكم الحكم في النهاية لتروا بأنفسكم أصعب اللحظات.

___________________

من وقت للتاني بفكر ايه أصعب اللحظات اللي ممكن الناس تمر بيها,و أدخل في جدل مع نفسي ان كان ده و لا ده و لا ده أصعب.المرة دي قررت أجادل في كل لحظة شوية و يمكن أوصل لحل في النهاية.المرة دي هتكلم في لحظة الحيرة,أو لحظة الاختيار,أو لحظة القرار.كان في فيلم هاوي قصير شفته قبل كدة عن شخص كان عليه انه يختار يا اما يضغط علي زرار أحمر و ياخد مليار دولار بس شخص ما علي الكرة الأرضية هيموت,أو انه ميضغطش علي الزرار و يستغني عن الفلوس من أجل الرجل اللي ممكن يموت بسببه,طبعا دي فانتازيا و في أمثلة من الواقع أصعب بكتير.(عارف انك عايز تعرف الراجل اختار ايه,حيلك شوية)ممكن يكون قرار مصيري بدخول الدولة في حرب أكيد هتأدي لخسائر في الأرواح الي جانب الخسائر الاقتصادية,أو يمكن هتحدد مصيرك و مستقبلك في تحديد فرع الدراسة ان كان علمي أو أدبي في ثانوي أو الكلية اللي هتدخلها أو حتي القسم اللي هتتخصص فيه في الكلية.ممكن يكون قرار هيحدد مستقبلك و مستقبل أولادك في اختيار الزيجة المناسبة ليك.ممكن يكون تحديد مصير حياه,زي في الولادة العسرة لو سألك الدكتور "تضحي بحياة الأم و لا الجنين؟".المشكلة ان القرار ممكن يكون كلمة واحدة بس...لكن يبني عليها مصائر و علي اللي اختار انه يتحمل العواقب.هي دي مشكلة الاختيار,انك لازم تكون أد المسؤلية في قرارك ده.ممكن تتراجع دلوقت عن قرارك,لكن التراجع بعدها بلحظة ممكن يكون متأخر.زي البورصة كدة,الثانية ممكن تفرق ما بين مكسب و خسارة,و ممكن بعد الخسارة مكسب.لكل قرار بتاخده في حياتك ثمن...و بالنسبة للنتائج,يا رابح,يا خاسر.بالنسبة للشخص اللي كان عليه يختار بين المليار و حياه الشخص,اختار المليار...لكن للأسف كان هو اللي هيموت لو خد المليار,فكان عليه تحمل عواقب قراره,اختياره هو اللي ضره في النهاية.بالنسبة للندم علي القرار,هنشوفه في موضوع تاني.حاجة زي فيلم "تأثير الفراشة" كان عبارة عن شخص بيقدر يرجع بالزمن للحظات من حياته...و كان كل ما يغير احداث كان بيغير أحداث حاضره,مرة تتبتر دراعاته و مرة يكون في مصحة نفسية و مرة اللي بيحبها تتحول لمدمنة مخدرات و..و..يعني من الأخر كان كل ما يغير لحظة من لحظات حياته بيأثر في نفسه و غيره.طب عايز أوصل لايه؟المشكلة اننا حياتنا مش كدة,مش فيلم فيديو تقدر ترجعه و تغير حدث فيه,يعني بطل الفيلم قرر في الأخر يقدي علي الطريقة اللي كان بيرجع بيها للحظات حياته القديمة.قرر انه يمنع علي نفسه الرجوع في القرار,لأن أي قرار لازم يكون نافذ,لازم نتحمل مسؤليته,بتدخن,جالك سرطان,نقطة في أخر السطر.لبست خفيف,جالك برد(هاااااتشوم)بعدين فعلا لازم نتأكد ان كل قرار بناخده مش هيضرنا و لا يضر حد تاني,لأن كل خطوة احنا بنعملها بتأثر فينا و في الناس.و مسيرك يوم ابنك يجيلك يقلك ليه؟ساعتها يا شاطر وريني هتقوله ايه.فسرله كل قراراتك الخاطئة.بلاش ابنك.ربك اللي هيحاسبك,مش علي كل قرار,بل علي كل لحظة,ساعتها هتقول ايه؟دي مشكلة القرار,يمكن أنا في بختبر اللحظة دي اليومين دول فحاسس انها اللحظة الأصعب.بالنسبة لي أوقات بخلي شخص يختار رقم واحد و لا اتنين,و بناء علي اختياره بنفذ,بس أكيد الحيرة مش بتكون في حاجة مصيرية,مش هختار بين ابني و أمه بملك و لا كتابة!!
كفاية كدة خلاص,قررت أريح بعد التعب في التفكير!!
سلام

كفاية أوفرلود

أوفرلود,معناها "حمل زائد" و ممكن تبان أكتر في الكهرباء لو حصل ماس و الأسلاك مبتستحملش الحمل الزائد فتبدأ تسيح.أو زي صورة الحمار اللي فوق ده.كمان في مثل بيقول اللي يزيد عن حده يقلب لضده.
ايه الموضوع بالظبط؟
الموضوع ان في ناس بيحصل عندها خلل نفسي,فتلاقوها جالها مرض "الأناريكسيا" اللي هو نحافة مبالغ فيها,يعني زي مرض "مجاعة الصومال" بس بيكون بقصد.و كمان الأكل المبالغ فيه برده مضر,الملح و السكر و اللحمة,كل واحد فيهم لو زاد في الأكل بيسبب أضرار في الجسم.
للأسف احنا في مصر بنعاني من الحمل الزائد العكسي,يعني ممكن نقول دول جنوب شرق أسيا عندهم حمل زائد في حب العمل(ادمان العمل),احنا عندنا حمل زائد في التنفيض للعمل(ادمان التنفيض). بعدين في ادمان الفهلوة,ادمان الحرام,علي رأي المثل"الممنوع مرغوب" و تسمع بقي حجج غريبة. واحد يغش و التاني ينافق و التالت يكدب و الرابع.....و الحجج بقي جاهزة...مهو كله كدة,و يشتغل علي نبرة الفساد منتشر و يقسم بانه حج 8 مرات و عمل عمرة مش عارف كام مرة,موضوع الحج أو العمرة بقي واجهة,و يا سلام لو الزبيبة واضحة في راسه و ماسك سبحة,كدة عين النفاق.طب صديقة ليا لسة راجعة من عمرة قالتلي ان أثناء خروجها من الحرم شخص جه كدة و مسك أيدها(ناقص يأنجها)و بعدين ده كدة و هو لابس لبس الاحرام.يعني معذور,عندة ادمان الهطل بعيد عنكم.طب ايه؟يعني الدين دوره ضعف؟لأ,ده داء "العبط الزائد" منتشر شوية,مسيرة يواجهة داء "العقلانية الزايدة".طب احنا كمصريين و احنا ماشيين في الشارع بنشوف ايه؟مش علي المرور حاش لله.علي الرصيف أما بيكون للمارة فقط.
شباب قالب شعره علبة جل و بنطلونه مسقطة و لازم من تحت يكون بقطع و طالع عينه لأنه مر علي كل أنواع الاوساخ,مهو عشان نعل الجزمة ميتوسخش,و يا سلام بقي لما تكون سماعة الموبايل البايظة حاططها في ودنه,او شغالة و معليها عالأخر عشان يبين للناس انه بيسمع موسيقي.و ماسك موبايل في ايد و الايد التانية ماديليا بتاعت اخته فيها من 8 ل10 ماديليات "داء نقص مفرط في الرجولة".نيجي للنقيض.شخص سني ملتحي و مقصر و متدين,ده مقدرش أقول عليه داء,بسم الله ما شاء الله ده تدين,لكن أوقات التدين ممكن يقلب لتعصب و بن لادن و اخوان مسلمين قبل ما يعقلوا.يبقي المبالغة في الحاجة غالبا خطر.كفاية 5 سنين في الكلية,كفاية 4 سنين في فترة الحكم,كفاية طفلين عشان يتربوا صح,كفاية حج مرة واحدة,و عمرة واحدة.كفاية استهبال,كفاية انحلال,يعني خلوها قناه "عالمكشوف" واحدة,و قناه "استهبال" واحدة,سرقة من بنك واحد,كفاية معونات,كفاية قتل للحريات,كفاية اعتصامات,الحكومة تقدر تقدم للناس حقوقها و مش هيكون فيه اعتصامات,كفاية استهبال.بعدين المبالغة في الوحدة,أو زي ما بنقول"احتكار" لما بيزيد بيقلب لضده,مش كفاية شبكة واحدة بتلطش جيوبنا كلنا,و مصنع حديد واحد,و حاكم واحد بس يحكم لوحده دولة شنكوتيشيا السفلي لربع قرن.
(ملحوظة:لا أنتمي لأي حزب و لا أي تيار سياسي,مليش في السياسة,من الأخر....دنا غلبااااااااان)
كفاية غش و تملق و رياء,كفاية سرقة و نهب بغباء,كفاية تخدير و تزوير,و ضحك عالشعب الفقير,كفاية لبس محزق و شعر ملزق.كفاية فتنة و قتتال داخلي,كفاية آلام و أحلام من غير علاج و تنفيذ.يا رب يصحا العرب من داء"ادمان الأغاني",غنيتوا للبنان و فلسطين و الوحدة و الحلم و الضمير رقصتوا و هيصتوا, فين الجديد؟بعدين؟
كفاية مسلسلات الفيلات و أغلي العربيات,و المليارديرات, كفاية مغالاه في الأسعار و في الغلط عند و اصرار و بين الطوائف شعللة نار.كفاية عدم الاحساي و عدم المسؤلية و عدم الضمير.كفاية
كفاية حضري و ستار اكاديمي و بصوا في أكل العيش.
كفاية عليكوا كدة.

انت ايه؟

احنا كبشر نعتبر أعقد(مش أعقل) المخلوقات و صعب تحليلنا و تحليل تصرفاتنا.ده بالنسبة لكتير مش معلومة جديدة.

و أنا بقدم في نشاط الأخ الأكبر ,قدمولي استمارة و قالولي أسلمها علي طول,لأن في واحد بات شهر و لحد دلوقت مجابهاش.المهم الاستمارة بقالها 5 ايام معايا يعني مش فترة طويلة.المهم مفيهاش غير سؤالين صعبين جدا.

واحد بيقول"هل تمارس أي نوع من أنواع العمل الاجتماعي؟ما هو؟" طب أنا بروح كل مدة النادي,و بتعسر في المواصلات العامة مع كل الركاب,و بروح الكلية كل يوم و بسلم علي زمايلي,هل دول يحسبوا؟

السؤال التاني بقي بيقول اييييييه؟"ما هي السمات العامة لشخصيتك؟"

غالبا اللي كتب السؤال ضاف "العامة" كصفة للسمات عشان ميحيرش الواحد لكن للأسف مفادتش كتير.دلوقت عرفت اللي غاب شهر غاب ليه!!أنا عن نفسي شايفني كتلة من الصفات المتناقضة,يعني ممكن أكون شغال لا مبالاه بس مش في كل الأحوال,يعني من وقت للتاني برجع لمبادئي و أوقات بقول ان هنا مش مكان مبادئ,أوقات أمشي أكني أسعد انسان مع ان مشاكل الدنيا محمولة علي كتافي,و أوقات تانية أدخل الحمام و أقفل المفتاح و أكتئب,و يستمر الاكتئاب لمدة طويلة.و أوقات بكون حساس جدا لأي حاجة تحصل حواليا,و أوقات تانية و لا هنا.متقلب؟دي صفة الأرصاد الجوية,بعدين بحرها واسع,متقلب المزاج و لا القرارات و لا ايه؟بعدين أنا سألت كذا واحد من صحابي.كل واحد بيوصفني من منظوره هو,يعني لو في الكلية هيقول متعاون,ملتزم بس مطرقع شوية,اللي اشتغلت معاهم المشروع قالوا كسول و منفض,بعدين فاكر حد كان قال اني غير واقعي(مش فاهم دي تنفع كاجابة و لا لأ!)...صحابي أوي ممكن يقولوا كسول عشان نفضت لكذا خروجة عشان النت.طب يعني موضوع "السمات العامة" ده محتاج أتكلم من انهي منظور؟و لو قلت اللي قلته هقوله في كام سطر؟أو كام صفحة؟يعني ال3 سطور مش هيكفوا.طب نحاول نحلل شخصية اللي كتب الاستمارة,يمكن نعرف سبب وجيه للسؤال المش وجيه ده,يمكن نكتشف انه وجيه,أو علي الأقل نلاقي اجابة مقنعة,صادقة,و سليمة.

الشخص ده بيكتب استمارة الأخ الأكبر,يعني عايز يعرف شخصية اللي بيملا الاستمارة ان كان ينفع و لا لأ,معلش يعني,أنا لو شخص وحش,هقدم علي نشاط الأخ الأكبر؟و لا هيجيلي قلب أأذي الأطفال؟طب فرضا كدة,هل أخواته و أمهاته هيسيبوني؟يمكن عشمان في اللي بيكتب الاستمارة الصدق.يبقي مفيش غير اني أكتب"انسان,بشر" أو "اعرفني و املا أنت"....أنا لحد دلوقت كاتب "مش عارف" لأني فعلا مش عارف.علي الله ميعتبروهاش علامة من علامات الجنون.

بالنسبة لسماتي,أنا اتقال عليا أهطل...يمكن أنا نشاطي زايد بس مش بيوصل للهطل,بعدين علماء كتير اتقال عليهم أغبيا و مجانين,و اتضح ان المشكلة مش فيهم علي أد مهي في الناس اللي محاولوش يفهموهم.

أنا ممكن أقول اني فني بحت,فعلا أي حاجة صغيرة ممكن تلفت نظري جمالها,ممكن لو لاقيت قطة أقف أتأملها و هي بتاكل أو بتستحمي او حتي ماشية كدة و خلاص.بغض النظر عن حبي للقطط,أنا فعلا من النوع اللي بيتأمل,ممكن يكون في عندي سمة قوة الملاحظة علي المدي البعيد,يعني ممكن أربط كذا حدث حصلوا بعاد عن بعض و أحلل حدث و أطلع حاجة محدش كان ملاحظها.

بعدين صعب أني أحدد سمات معينة في شخصيتي الا لو قارنت بيني و بين حد تاني,أطلع الاختلافات,لكن مينفعش اطلع سمات أساسية كدة مطلقة,لأنها ممكن تكون في كل البشر,و كدة مش هتبقي سمة تخصني كأنا لكن كبشر.عامة الموضوع محتاج تفكير كتير و تأمل أكتر,بس صراحة أنا تعبت و عايز أنام,و بعدين مش فاضي لتأمل في حاجة خدت مني ساعة عشان أكتبها,علي الأقل مش دلوقت خالص!!

أبديت:صديقي مجدي وافق يساعدني و يكتب الصفات بدل كلمة "مش عارف" و أنقل لكم من الاستمارة ما كتبه:"ذكي-خفيف الظل-طويل البال-حازم-مثقف-مؤدب-كسلان بعض الشيء"

نيجي لتحليلي لاجابته:"فهلوي(جايز)-دمه خفيف بزيادة-جبلة-عنيد-يعرف يفك الخط-بيعرف في الاتيكيت-كسلان بعض الشيء,أو كله مش فارق)

أغبي حرامي؟

ده المفروض الحرامي الأقل حظا,شفتم يا شباب عدم وجود خطة في السرقة بيأدي لي ايه؟
بس لازم نتعلم من الراجل ده الاصرار.

ده بقي بيعلمنا ازاي نعرف نرجع من نفس المكان اللي جينا منه

حرامي في حاسبات و معلومات

(حدث بالفعل بتصرف)
حرامي في حاسبات و معلومات
"بعد أن نجحت في تنفيذ عدة سرقات في هندسة قررت تنفيذ سرقات أخري في حاسبات و معلومات و ذلك لأنه لا مفر من وجود أجهزة لابتوب,لكن أحتاج لخطة محكمة تجعلني أسرق تلك الأجهزة.أولا,عايز يكون عدد الضحايا كبير,بس مش أوي عشان متقفش من حد منهم.
طب لازم يكون الضحايا مشغولين,في محاضرة يمكن و لا....أو بيصلوا!!بعدين الموضوع لو فيه موبايلات يكسب جامد,بس الشباب بيشيلوا الموبايل في جيوبهم و البنات بيشيلوه في الشنط.يبقي موقع الجريمة مصلي السيدات.بس المشكلة ان اللي هينفذ لازم يكون ست,أو بنت عشان محدش يقفشها.بس ممكن اللي بتئم تخلص بسرعة قبل مالسريقة تتم.يبقي هنحتاج لواحدة تئم بضمير.خلصت يبقي بنتي و بنت الجيران هينفذوا الخطة.واحدة تئم البنات لمدة كافية عشان التانية تلم اللي يتلم و تدور في الشنط.
المهم البت سعدية لبست الخروج بتاعها و الحجاب و دخلت الكلية من غير أي مشاكل,مهي متعلمة علي أيدي,ولاون الأمن مش هيبصلها أصلا,زيها زي باقي الطلبة.المهم راحت المصلي و لاقت بنات بيصلوا جماعة و بنات واقفين,قالتلهم يا اما يصلوا مع الجماعة دي يا اما يستنوا لما يخلصوا عشان تئم بيهم.المهم دول خلصوا,دي دخلت تئم.بالمناسبة بجد سورة البقرة اللي محفظهالها جابت نتيجة,البت صلت بيهم نص ساعة.نص ساعة و كل حاجتهم وراهم جنب الحيط.بت الجيران بهانة دخلت عالشنط و فتحت الشنط و لمت المحمول,بس الشنط اللي عصلجت معاها شنط أجهزة الكمبايوتر المحمول,البت مكانتش عارفة ده ايه,مهي جديدة في الصنعة,المهم كلمتني عالمحمول تقوللي,البت دي هبلا و لا ايه؟المهم سمعت الكلام و شالت 3 شنط معاها اتصادف ان واحد منهم كمبايوتر محمول.و الباقي فيهم فلوس و كلام كويس.
خطة الخروج كانت كالتالي,يا اما بهانة تخرج شنطتين علي مرحلتين و الباقي علي سعدية,أو لو الأمن مشدد يسيبوا الحاجات في عربية برعي سواق نص النقل اللي بيحمل عيش فينو للكفيتيريا.المهم الخطة الأولي اتنفذت,البت هنادي بقي,كان دورها تصلي مع البنات أكنها طالبة معاهم و تروح تشوف هيعملوا ايه,مهو برده عشان لو حصل حاجة تكون فاهمة اللي حصل أو تحاول تلمه.قالتلي ان البنات راحوا للأمن يقولوله انهم بقالهم 4 سنين محصلش معاهم كدة,راح الظابط قالهم,"أهو حصل و خلاص هنعمل ايه؟".و الله كان العشم فيك كدة برده يا عم هلال,طول عمرك طيب و ابن حلال.

حوار عن المعاكسة

ده كان حوار من ال 7 ساعات و نص اللي سجلناهم,ده عجبني لأن فيه أجوبة كتير و اختلاف في وجات النظر,الحوار كان مع 3 بنات من تجارة القاهرة
الحوار الأول