شبهو في المصيدة

هو ممكن تخيل يتحول لحقيقة؟يعني لو حد تخيل قصة,هل ممكن تحصل؟
كان جه في بالي قبل كدة ان ممكن يكون ليا أخ توأم و أنا مش عارف(زي الأفلام الهندي كدة) و تخيلت قصة فيها بيرتكب جريمة فيشتبهوا فيا و بعدين أما يفهموا سوء التفاهم و يخرجوني أقابله في السوبرماركت و لا حاجة.
ممكن اعتبره خيال طفولي أيام ما كان خيالي خصب و طفولي.بس لما كل شوية ألاقي حد يقول في حد شبهي,لحد هنا و أقف بقي!!في ايه؟كلكوا شبهي و لا ايييييه؟
ماشي,حاضر أديني ههدا أهو و هحكي اللي حصل.
في يوم من أيام أجازة الصيف,كنت راجع و معايا الطلبات,اذ فجأة شاب أكبر مني بسنتين و لا حاجة,شاب في الجامعة يعني(كنت ساعتها لسة في ثانوي)
سلم عليا و قاللي "انت مش أخو أحمد برده؟" قلتله اني وحيد مليش اخوات ولاد.فضلنا يقول اني شبه أخويا أوي و انا أقول أنا مش أخو أحمد,كمان ربع ساعة و كنت هقتنع فعلا بان الشاب ده صاحب أخويا أحمد...الا هو اسمه أحمد؟
عدي الموقف و اتنسي,و بدأت دروس و في أول يوم ليا في درس عند بيت واحد معرفهوش,حد من اللي هياخدوا الدرس قاللي,"أنت هيثم؟أنت هيثم!!" و من ساعتها و أنا بقي اسمي هيثم!!بسبب تشابهي مع شخص معرفهوش اسمه هيثم.....و زمن عدي و فات و كبرت و دخلت الكلية,سنتين كدة و في مرة كنت بسلم علي شاب كنت أعرفه بس دخل قسم تاني,و كان معاه شلة,حد منهم فجأة يقوللي"انت اتصالات؟أنا أعرف واحد شبهك شكلا و صوتا و شخصية في قسم كيميا",طب شكلا و صوتا ماشي,بس هو لحق يتعامل معايا عشان يلحق يعرف شخصيتي؟ما علينا(يمكن يقصد حركات جسمي اللا ارادية أثناء الكلام)الموضوع عديته بمزاجي.أجازة الصيف جت و تربية عسكرية و بتاع,في يوم كنت خلصت تدريب و رايح الحمام أغير هدومي ,شخص معرفهوش معايا في التدريب باين عليه لسة في أولي و لا حاجة بيسألني "ليك أخ في أولي اتصالات؟"هنا بقي قلتله"ايوااااا,تعالي هنا بقي,اسم اللي شبهي و سنه و عنوانه!!" و خدت اسمه و اسم شهرته علي أمل اني أدور عليه و الأقيه و أشوفه.الصراحة لحد دلوقت معايا اسمه و مفكرتش أدور عليه.نفس الأجازة كنت بضيف كليبات مصورة ليا عالنت كمدونة مصورة,المهم لاقيت تعليق لواحدة بتقول اني شبه أخوها,بعت ليها رسالة بطلب منها أشوف صورة أخوها,بس للأسف نفضتلي.من كام يوم حد من زمايلي في الدفعة جه بيقوللي,"الحق ده في حد معانا في الدفعة شبهك",بس أنا متربي مع الدفعة دي سنتين لحد دلوقت,يعني سنتين و مشوفتوش؟يبقي أكيد مدبلر,فسألته ان كان مدبلر قاللي فعلا انه مدبلر.يبقي في واحد في كيميا و واحد في الدفعة اللي بعدنا و واحد في دفعتنا!!ده حصار ده و لا ايه؟الموضوع بقي فعلا ممل,بقي في أوفرلود,أنا ليا نسخ كتير ليه؟بلاش,أنا خلقتي دي منتشرة ليه؟طب أنا لما كان شعري طويل زي الممسحات اللي بشوفهم كل يوم دول ,محدش كان بيقول اني شبه حد يعرفه ليه؟
اللذيذ اني لحد دلوقت مشفتش نفسي,أو شبيه ليا,كله بالسمع بس.بعدين أنا ليه عايز أشوف اللي شبهي دول؟سؤال وجيه...يمكن حب استطلاع؟شيء ممتع اني أشوف حد شبهي؟أو يمكن عشان أتأكد انه مش أخويا؟طيب فرضا شفته,هتصاحب عليه؟فليكن,بعدين يعني؟أنا اليومين دول بقيت بفكر ان كنت أنا أفضل واحد فيهم و لا حد أفضل مني,طبعا الأفضلية بالنسبة لي في الأخلاق و يمكن الشكل.
و الله أنا صديقي مجدي في شبه بيني و بينه,في الشخصية و في البرج,بس مفيش توافق تام في الشخصية,كل واحد برده له شخصيته و صفاته اللي تخصه و كذلك الخبرات,يعني يمكن الاختلافات أكتر من التشابهات,و يعتبر زي أخويا أحمد اللي مشوفتوش.يعني ممكن أنا و شبيه نكون نفس الوجه بس كل واحد له ميوله الخاصة و أسلوب حياته,و يا عالم ممكن يكون رد فعله ايه لما يقابلني...ممكن يقول عليا شكلي وحش(مهو الواحد شكله مش مألوف بالنسبة له خارج المراية)
طب أنا والدي اكتشف ان في ليا قريب في دفعتي,حاولت أقابله في مرة و أتضح لي انه مش بيتجاوب,يعني أنا قريبه,طب و
ايه يعني؟صحيح رد فعل يصدم بس أعمل له ايه,هو حر,له حياته و صحابه,مش محتاج قريب غلس يقتحم عليه حياته,و بنشوف بعض و لا أكني كلمته قبل كدة.اللي أقصد أوصله لنفسي قبل ماوصلهولكم اني مش لازم أهتم برد فعل اللي شبهي ده,أصل فعلا هيعمل ايه لما يبقي شبهي؟طب أنا شبهه,نبقي أصحاب يعني؟و لا أدور عليه لما ملاقيش مراية؟بعدين مش بعيد لما يكتشف انه له شبيه يرتكب جرايم و يحط في حسابه انه بكدة ممكن انا اللي ألبسها...و يمكن ساعتها لما يلاقوني يقولوا"امسك شبييييييييه"
و ربنا يستر