موقعة السيدات 2

مساء الخير أو صباح الخير .. كله على حسب المعاد اللي بتقروا فيه..

النهردة بجد طفح الكيل .. وصلت لدرجة من العصبية اني مش قادرة أقف على رجلي .. تخيل لما حد يشتم أختك واللا والدتك شتيمة مش كويسة؟؟

ممكن تعمل ايه؟؟ و رد فعلك حيكون إزاي؟؟

مش فاهمين حاجة!! ماشي نبدأ من الأول عشان نفهم للآخر...

من 3 شهور من ساعة ما عربية السيدات اتغيرت وبقت في النص والدنيا اتلخبطت عالآخر... عربية السيدات كلها رجالة .. قلنا معلش يمكن لسة ما يعرفوش ياعيني..

بدأنا نتكلم بذوق يا جماعة دي عربية سيدات .. يا جماعة العربية مكانها اتغير .. ولا حياة لمن تنادي

قلنا يمكن الكلام بتاعنا مش بيوصل لهم .. أو مش مفهوم بالنسبة لهم !!

طلعنا نشتكي للعواطلية اللي موجودين فوق (قلنا اهم رجالة يمكن يفهموا بعض).. ثبتونا بشوية كلام وخلاص على كدة !!

واستمر الحال على ما هو عليه

لكن لا يضيع حق ورائه مطالب... بدأنا ناخد حقنا بنفسنا ونزعق مرة ونطنش مرة .. ونسمع كلام بايخ ونعديه مش مشكلة

لكن انها توصل ان واحد يشتم بألفاظ بذيئة دي بقى قمة المسخرة وانتهاك الحق.. يعني راكبين معانا وبتقلوا أدبكوا لالالالا كدة كتير ....

كان لازم حد يقول لأ بأعلى صوته ..

بغض النظر عن الستات اللي بتبص باستسلام واللي مش فارق معاها حاجة واللي شايفة اننا ممكن نعتبرهم زي اخواتنا أو أبائنا..

المهم .. اللي حصل بقى النهردة كالتالي ..

ركبت المترو من محطة رمسيس عربية السيدات فقط (أصل في رجالة بتستعبط وتقول كل العربيات من بعد 9 مختلطة) لأ في عربية طول اليوم سيدات (دا للعلم فقط)

وبعدين بسم الله الرحمن الرحيم 4 رجالة ركبوا معانا قلنا عادي هوينين.. نتكلم معاهم براحة واكيد حيفهمونا ..

سبقنا الله يكرمه عسكري المحطة اللي كان لسة صاحي تقريبا من النوم.. وقالهم انها عربية سيدات واحد بس كان باين عليه انه حد محترم وقام واخد بعضه ونازل .. اما التلاتة اللي فضلوا تقريبا تخيلوا نفسيهم سيدات زينا زيهم ..

محطة ورا محطة والرجالة بتزيد والستات يا عيني بتتحشر في بعضها..

دخلت واحدة منقبة الله يكرمها وبدأت تقول بكل ذوق وهدوء يا جماعة دي عربية سيدات ومينفعش نبقى واقفين أكتافنا في أكتافكوا .. وبعدين دي عربية واحدة بس والباقي ليكو الحق تركبوها .. وبدأ النقاش .. كل واحد عنده كلمة بدأ يقولها ..

وفجاة لقيت قدامي اتنين تقريبا واحد منهم لواء والتاني نقيب (مفكرين نفسهم كدة ) و بيتكلموا بكل ألاطة

احنا ممكن نفضي العربية دي كلها ونفضل احنا قاعدين فيها.. أنا سمعت الكلمة وعملت عبدو العبيط وكبرت شوية كدة سمعت الصوت بدأ يعلى ببص الله دي خناقة بجد بنت بتتكلم وبتساند الأخت اللي اتكلمت في الأول قام شاب ظريف لطيف راح شاتم البنت شتيمة مش محترمة خالص .. الكلمة خرمت طبلة ودني وخلاص وقتها دي كانت القشة التي قصمت ظهر البعير..

استنيت المترو وقف في محطة الدقي والباب اتفتح و حضرة اللواء نزل ومعه سيادة النقيب مستنين الناس ينزلوا عشان يركبوا تاني.. وهما جايين يركبوا تاني ومش عاجبهم وبيقولو ما انتو بتركبوا عربية الرجالة والباب بدأ يقفل وهما بيركبوا فمسكوا الباب باديهم و ايدي وايد بنت كملوا 4 و قلت الرجالة كلهم ينزلوا فتكلم حضرة اللواء وقال تاني احنا نفضي العربية دي ونركب احنا لوحدنا.. وبدأت الخناقة من ناحيتي

وفضلت ماسكة باب المترو عشان ما يمشيش وقلت المترو مش حيتحرك الا لما ظابط المحطة ينزل والسواق يجي و كل الرجالة تنزل!!

وكبرت في دماغي.. وصوتي كان أعلى منه مفيش .. الغريب اني قلت انه مفيش راجل حيسمح على نفسه انه في بنت تزعق له ويفضل واقف في العربية .. الدر اللي صعقني بقى احنا مش رجالة!!!! فعلا الرجالة ماتوا في الحرب.. دا كان ردي

المهم فضلنا على الحالة دي حوالي 20 دقيقة وكل اللي في العربيات اللي حوالينا من الرجال طبعا داخلين فينا شمال انتوا عايزين ايه؟؟ انتوا معطلينا والغريب بقى والأعجب انه كان في سيدات بيزعقولنا كمان.. حاجة تشل.. طيب يا أختي انتي متنازلة عن حقك في غيرك مش متنازل عن حقه.. كفاية بقى اهانات لحد امتى حنفضل نتلطش على قفانا واسكتين .. قولوا مرة لأ..

وبالرغم من الزيطة دي ما زال عنصر الرجال متواجد في عربية السيدات(والله معندهم دم)

وانا دمي غلي كمان وكمان .. وأصريت أكتر وأكتر أصل خلاص بقى واحد يشتم بنت بطريقة زي كدة يبقى خلاص المرة الجاية نتضرب.. وملناش حق نتكلم ما احنا اللي أهملنا ..

كل ده ولسة الرجالة موجودة والباب بيقفل ويتفتح علينا .. واحنا واقفين انا والبنت اللي كان صوتها مقوي صوتي .. وفضلنا على كدة لحد ما الأخوة العاطلون اللي فوق نزلوا ونزلوا كل الرجالة اللي في العربية .. وكان انتصارا عظيما..

بس أكيد بكرة حترجع ريما لعادتها القديمة..

ويبقى انت أكيد أكيد في مصر..