الأوشاح الملونة و ما ترمز اليه

أول مرة أعرف موضوع أوشحة التوعية كان في يوم سرطان الثدي من اعلان محطوط في محطة مترو,بعدين عرفت من صديق ان في وشاح أصفر بيضعه كل اللي حسين بوجود ميول انتحارية عندهم بحيث ان الناس تحاول تساعدهم يتخطوا الميول دي و صحتهم النفسية تتحسن.طبعا الوشاح لوحده مش كفاية للتوعية ان كان مجرد رمز,لكن لو وشاح معين معروف انه لمناهضة حاجة أو لتوعية الناس من حاجة,يبقي سهل استخدامه لوحده في التوعية من الحاجة دي.يعني أظن لو في بلد متعرفش موضوع الوشاح الأصفر و حد حط وشاح أصفر,محدش هيعبره,و ده لو هو أصلا يعرف الوشاح الأصفر.شفتم أهمية الأوشاح؟
عشان كدة اهتميت بالموضوع و قررت انقل ليكم ما يرمز له كل وشاح,و ان زادت معاني الوشاح الواحد,مهو كل بلد بوشاحها بقي!

الوشاح الأبيض
لمناهضة العنف ضد المرأة


الوشاح الأصفر
للتوعية و الحماية من الميول الانتحارية
و اظهار الميول الانتحارية


الوشاح الأزرق
للتوعية بالتحرش بالأطفال
الوشاح الأزرق الفاتح
لتوعية بسرطان البروستاتا


الوشاح البنفسجي
لاظهار التسامح الدين
للتذكير و التوعية بالعنف ضد المرأة
لمناهضة العنف المنزلي


الوشاح البرتقالي
للتوعية بحماية الحيوانات
لاظهار ميول ايذاء النفس
الدعوة لاغلاق معتقل جوانتانامو


الوشاح الأحمر
للتوعية بمرض الأيدز


الوشاح الرمادي
للتوعية بمرض السكر


الوشاح الوردي
للتوعية بمرض سرطان الثدي


الوشاح الأخضر
للتوعية بنقل الأعضاء و زرع الأعضاء
للتوعية بحماية البيئة


الوشاح البني
دعوة لوقف البريد الالكتروني المسلسل


في معاني أخري للأوشحة الموجودة الي جانب اني مذكرتش أوشحة تانية لعدم وجود مصادر تؤكد وجودها
تم الاستعانة باللينك ده في كتابة هذا الموضوع

رجاء لكل قاتل و مجرم

يوم الخميس و أثناء ذهابي لمشوار بعد المحاضرات,مررت بموقع جريمة قتل في الدقي,و لأن مكنا الجريمة يطل علي شارع حيوي,يفصل بين موقع الجريمة و الحرم الجماعي,فكانت كل السيارات المارة بالمكان متباطئة,و كالعادة الناس متجمعة و لا أكن في عيش هيتوزع ببلاش عليهم,ان كان ميكفيهمش 10 طن دقيق عشان ينزاحوا.المهم,طبعا الهوجة دي كلها عربيات و بشر موقفين الشارع و الشارع ما بيصدق يلاقي حد يوقفه أصلا,و الناس في وجوههم نظرات صدمة و تعجب و لهفة,يمكن عايزين يشوفوا الضحايا و لا يشموا ريحة الدم و لا ياخدوا امضاء القاتل المجرم في الأوتوجراف.
الموضوع ممكن يكون ممتع الوقوف في مسرح الجريمة أو قريب منه,بس للأسف مش ممتع لناس كتير اتزنقوا في شارع رئيسي واقف نتيجة للجريمة.
يعني لو جينا نشوف مين المستفيد من الجريمة,
أولا:الجاني(القاتل)
يمكن استفاد انه تخلص من ناس غير مرغوب فيهم,في وجهة نظره,طبعا ده بغض النظر عن تضرره من حكم الاعدام شنقا و لا حرقا و لا غرقا.
ثانيا:المجني عليهم(المقتولين/المصابين)
حسب اللي عملوه أو ملابسات الجريمة,ممكن يحسبوا شهداء لو بيدافعوا عن أهلهم أو بيتهم,و لو مش شهداء,يكفي انهم انتهت حياتهم بدري,عشان السيئات اللي كانوا ممكن يرتكبوها لحد الشيخوخة,يمكن كمان نالوا أمنية قتل الجاني,صحيح هما ماتوا,بس هو هياخد اعدام برده.
ثالثا:عابر السبيل(الماشي)
يمكن استفاد انه وقف في مسرح جريمة و اتفرج علي المشتبه فيه أو دم الضحايا,و يمكن اتعظ,يمكن تعاطف مع الضحايا أو الجاني اللي يمكن يكون في نظره ضحية
رابعا:عابر السبيل(الراكب)
نفس كلام عابر السبيل الماشي,بس بياخدها عالطاير,أو يقف ثواني يعطل فيهم صف العربيات اللي مستنيين دورهم انهم يبصوا
خامسا:الضحايا الفعليين
الركاب اللي قدرهم يمروا من الشارع,و لا في دماغهم أصلا يشوفوا جريمة قتل و لا بتاع,و دول اللي في الغالب رد فعلهم لما بيمروا علي مسرح الجريمة يقولوا بنرفزة"استغفر الله العضيم من كل ذنب عظيم,ناقصة اصلها"
بغض النظر عن ردود فعل الناس,همي دلوقت حاجة مهما جدا أغفلتها في أول فقرة و هي:
الشارع الغلبان اللي ما بيصدق يلاقي حد يوقفه,و كذلك الضحايا الفعليين اللي بيتعطلوا و اللي فعلا مش ناقصين عطلة.
أرجو من كل مجرم و قاتل,انه يعيد التفكير في مسرح الجريمة,بلاش الشوارع الرئيسية و بلاش الميادين,بلاش الكباري و الأنفاق الحيوية.
و اللي نفسه يدوس حد,لو سمحت,أنا عارف انك بتحب تسوق بسرعة و بتموت في صوت الموتور و انت منطلق بأقصي سرعة,بس انتقي مكان الناس فيه قليلة و ميكونش شارع حيوي,بحيث لو حصلتلك حادثة و لا دوست حد,متسببش أزمة مرورية.
كذلك أنصح بانتاء أوقات يقل فيها المرور,يعني مش تقتل وقت الذروة,يعني لما تقتل في وقت الذروة,أولا الشرطة و الاسعاف بيتأخروا نص ساعة لو الشارع فاضي ,بالك بقي و انت في وقت الذروة؟و بالك بقي لما يوصلوا و يقللوا متوسط المسافة اللي العربية بتتحركها من 2 متر في الدقيقة ل2 متر في الساعة,ده كدة يرضيك؟

موتوريجل من ساراي القبة للتحرير

أنا:ممكن تعرفنا بنفسك؟
هو:أنا شاب مصري عندي 21 سنة
أنا:و هل بتمشي كتير؟
هو:كل اسبوع بحاول انتهز الفرصة و امشي شوية
أنا:ايه اللي دفعك انك تمشي من ساراي القبة للتحرير؟
هو:المترو يا سيدي,قال ايه عطل,اتفرجت عليهم و هما بيحاولوا يصلحوا عربية في محطة ساراي القبة و قررت أخدها مشي محطة و لا اتنين لحد ما يتصلح
أنا:و كان العطل ايه؟
هو:كان في قضيب من القضبان اللي بيكونوا فوق العربية و بيوصلوا كهرباء حاصل ليه حاجة و كانوا بيحاولوا يفصلوه عشان ميوصلش كهربا للعربية و يكهرب الناس,ده استنتاج نتيجة لفهمي المحدود لهندسة عربية المترو.
أنا:و اللي مشيتهم ييجوا كام محطة؟
هو:من سراي القبة-حمامات القبة-كوبري القبة-منشية الصدر-الدمرداش-غمرة-مبارك-ناصر-سادات
أنا:8 محطات؟خدتهم في أد ايه؟
هو:من الساعة واحدة للساعة 3 وصلت لغمرة و استريحت شوية و بعدين الساعة ثلاثة و نصف كنت عند السادات.
أنا:و هل فضل متعطل؟
هو:أه,لولا اني مسمعتش كلام الموظفين الكدابين,كنت هبقي زي الناس اللي يا عيني كانوا مزنوقين زنقة سودا في عربيات المترو,أنا حتي ارتبكت لما شفت نفس منظر المترو اللي الناس معصورة فيه نتيجة لتشابه المنظر في محطة مبارك و السادات.
أنا:هل انت تابع لأي أحزاب سياسية؟
هو:نهائيا
أنا:مش مشترك في جروب 6 ابريل؟
هو:اه,بس متقدرش تقول ان دي كانت مسيرة احتجاج,لأني مكنتش مخطط لكدة أصلا.
أنا:طب متعبتش؟
هو:أكيد,أنا كنت خايف بس تجيلي ضربة شمس و لا يغمي علي من الحرارة و الجفاف,بس طبعا قدمي وجعني,خاصة اني كنت لابس جازمة فورمال,مش كوتشي يعني,لأني كنت رحت صلاة جنازة واحد قريبي.
أنا:البقاء لله
هو:سعيكم مشكور.
أنا:طب هل ممكن تكرر التجربة دي تاني؟
هو:والله,مفيش مانع بس يكون الموضوع بمزاجي,مكونش مجبر و مش جاهز يعني.
أنا:طب سؤال بينخور في دماغي,ليه مخدتش أي تاكسي و لا حاجة بدل ما تمشي المشوار ده؟
هو:أنا حسيت ان الموضوع تجربة كويسة اني أمشي من محطة للتانية بعدين استحليت الموضوع بعد محطتين,بعدين أنا قلت هوفر وقت و فلوس و منها كمان بمارس رياضتي المفضلة
أنا:طب بعد مشي ساعتين و نصف,و وصلت للبيت,عملت ايه؟
هو:أولا لما وصلت التحرير خدت ميكروباظ من هناك و وصلت البيت خمسة الا,عشان الطريق كان زحمة و قبلها الميكروباظ كان بالضرب,المهم رجعت البيت,ألاقي النور مقطوع,قلت اشطة جت علي ده؟طبعا لما أهلي عرفوا القصة قالوا اني مجنون,و سألوا نفس سؤالك اللي كان بينخور في دماغك.
أنا:طب و هل انت فعلا مجنون؟
هو:الجنان هو انك تعمل حاجة غير منطقية بدون أي داع,اللي عملته مبني علي أسباب منطقية و سليمة,بعدين الموضوع نسبي,مش يا موجب يا سالب.
أنا:طب التجربة دي كلفتك ايه غير قلم القدم؟
هو:3 جنيه ثمن ازازتين مياه ساقعين 600 ملي لتر و 2 جنيه و ربع ثمن ازازتين حاجة ساقعة لزوم السكريات و الفرفشة.ليه؟هتدفعم؟
أنا(عملت ماسمعتش):طب فايدتك من التجربة دي ايه؟
هو:بدنيا,و اني جربت حاجة جديدة و حسيت بان مفيش مسافة طويلة ما دام ممكن نمشيها.
و هنا ينتهي الحوار السبق الصحفي اللي عملته مع نفسي لما رجعت البيت و رجع النور و قدرت أكتب الحوار ده.

عالمعاش

و أنا موظف سابق عالمعاش
بحلم كل حاجة تبقي ببلاش
الخدمات و الأكل و حتي القماش
أسعارها صبحت مولعة نار

النور و التليفون و الزبالة
خلوا محفظتي في أسوأ حالة
فواتير تهد حيل الرجالة
حتي بدون سابق انذار

يلغوا الدعم ليه يا ناس؟
لازم المواطن يكون محتاس؟
القرار أتاخد علي أي أساس؟
و لا دي عن الناس أسرار؟

علاوة تيجي,أسعار تزيد
ياريتنا احنا كمان نستفيد
و لا الدولة فينا بتبيد؟
و لا بيننا و بينها تار؟

كلمة قصيرة1

أجمل اللحظات هي التي تتابع فيها نمو طفل