موتوريجل من ساراي القبة للتحرير

أنا:ممكن تعرفنا بنفسك؟
هو:أنا شاب مصري عندي 21 سنة
أنا:و هل بتمشي كتير؟
هو:كل اسبوع بحاول انتهز الفرصة و امشي شوية
أنا:ايه اللي دفعك انك تمشي من ساراي القبة للتحرير؟
هو:المترو يا سيدي,قال ايه عطل,اتفرجت عليهم و هما بيحاولوا يصلحوا عربية في محطة ساراي القبة و قررت أخدها مشي محطة و لا اتنين لحد ما يتصلح
أنا:و كان العطل ايه؟
هو:كان في قضيب من القضبان اللي بيكونوا فوق العربية و بيوصلوا كهرباء حاصل ليه حاجة و كانوا بيحاولوا يفصلوه عشان ميوصلش كهربا للعربية و يكهرب الناس,ده استنتاج نتيجة لفهمي المحدود لهندسة عربية المترو.
أنا:و اللي مشيتهم ييجوا كام محطة؟
هو:من سراي القبة-حمامات القبة-كوبري القبة-منشية الصدر-الدمرداش-غمرة-مبارك-ناصر-سادات
أنا:8 محطات؟خدتهم في أد ايه؟
هو:من الساعة واحدة للساعة 3 وصلت لغمرة و استريحت شوية و بعدين الساعة ثلاثة و نصف كنت عند السادات.
أنا:و هل فضل متعطل؟
هو:أه,لولا اني مسمعتش كلام الموظفين الكدابين,كنت هبقي زي الناس اللي يا عيني كانوا مزنوقين زنقة سودا في عربيات المترو,أنا حتي ارتبكت لما شفت نفس منظر المترو اللي الناس معصورة فيه نتيجة لتشابه المنظر في محطة مبارك و السادات.
أنا:هل انت تابع لأي أحزاب سياسية؟
هو:نهائيا
أنا:مش مشترك في جروب 6 ابريل؟
هو:اه,بس متقدرش تقول ان دي كانت مسيرة احتجاج,لأني مكنتش مخطط لكدة أصلا.
أنا:طب متعبتش؟
هو:أكيد,أنا كنت خايف بس تجيلي ضربة شمس و لا يغمي علي من الحرارة و الجفاف,بس طبعا قدمي وجعني,خاصة اني كنت لابس جازمة فورمال,مش كوتشي يعني,لأني كنت رحت صلاة جنازة واحد قريبي.
أنا:البقاء لله
هو:سعيكم مشكور.
أنا:طب هل ممكن تكرر التجربة دي تاني؟
هو:والله,مفيش مانع بس يكون الموضوع بمزاجي,مكونش مجبر و مش جاهز يعني.
أنا:طب سؤال بينخور في دماغي,ليه مخدتش أي تاكسي و لا حاجة بدل ما تمشي المشوار ده؟
هو:أنا حسيت ان الموضوع تجربة كويسة اني أمشي من محطة للتانية بعدين استحليت الموضوع بعد محطتين,بعدين أنا قلت هوفر وقت و فلوس و منها كمان بمارس رياضتي المفضلة
أنا:طب بعد مشي ساعتين و نصف,و وصلت للبيت,عملت ايه؟
هو:أولا لما وصلت التحرير خدت ميكروباظ من هناك و وصلت البيت خمسة الا,عشان الطريق كان زحمة و قبلها الميكروباظ كان بالضرب,المهم رجعت البيت,ألاقي النور مقطوع,قلت اشطة جت علي ده؟طبعا لما أهلي عرفوا القصة قالوا اني مجنون,و سألوا نفس سؤالك اللي كان بينخور في دماغك.
أنا:طب و هل انت فعلا مجنون؟
هو:الجنان هو انك تعمل حاجة غير منطقية بدون أي داع,اللي عملته مبني علي أسباب منطقية و سليمة,بعدين الموضوع نسبي,مش يا موجب يا سالب.
أنا:طب التجربة دي كلفتك ايه غير قلم القدم؟
هو:3 جنيه ثمن ازازتين مياه ساقعين 600 ملي لتر و 2 جنيه و ربع ثمن ازازتين حاجة ساقعة لزوم السكريات و الفرفشة.ليه؟هتدفعم؟
أنا(عملت ماسمعتش):طب فايدتك من التجربة دي ايه؟
هو:بدنيا,و اني جربت حاجة جديدة و حسيت بان مفيش مسافة طويلة ما دام ممكن نمشيها.
و هنا ينتهي الحوار السبق الصحفي اللي عملته مع نفسي لما رجعت البيت و رجع النور و قدرت أكتب الحوار ده.