أرضي و لا أخر دور؟

لو حد فكر يسكن,و محتار يسكن في الشقة الأرضي و لا اللي في الدور الأخير,أو محتار بين اختيارين متضادين,هيستفاد من القارنة دي.
هنفرض شوية فروض مبدأيان لتخيل الموقف,
أولا:الشقتين نفس المساحة و بيطلوا علي نفس الاتجاه من المبني بس الفرق في ارتفاع كل منها عن مستوي الأرض.
بس كدة مفيش فروض تانية.
نبدأ في المقارنة:

أولا:أثناء الزلزال
صحيح لو حصل زلزال أول ناس تخرج من المبني سكان الدور الأرضي,بس لو لا قدر الله انهار المبني بدون ناجين,سكان الدور الأخير احتمال نجاتهم أكبر.

ثانيا:التنقل
أكيد السكن في الدور الأرضي بيوفر وقت النزول عالسلالم و تكاليف اصلاح أعطال المصعد (الأسانسير يعني) و لو شاري طلبات بيزيد المجهود كل ما علي مكان السكن.

ثالثا:الغسيل
طبعا البنات حاسة بالموضوع ده أكتر من الولاد,نشر الغسيل في الدور الأرضي بيكون بالليل,لأن الصبح بيكون غسيل كل الأدوار منشور,و غسيل الجيران اللي فوق بيرخ علي غسيل الجيران اللي تحت بفعل الجاذبية,يعني من الأخر في مشاكل في الغسيل بعكس السكن في الدور الأخير اللي ملهوش جيران فوقيك.

رابعا:الغسيل
عمر ما حرامي الغسيل سرق الغسيل من حبل الدور الأخير,دايما حرامي الغسيل كان بيشتغل علي حبل الدور الأرضي

خامسا:الحرامي:
طبعا زي ما جيبنا سيرة حرامي الغسيل,لازم يكون للطيب نصيب,الحرامي الشامل اللي ممكن ينط في البلكونة و يسرق اي حاجة و كل حاجة,طبعا المشكلة دي حلوها بتغطية البلكونة بحديد

سادسا:المياه
في أحيان كتيرة,أثناء مراسم قطع المياه,أخر ناس بتنقطع عنهم المياه هما طبعا اللي في الأرضي.و بفضل اللي في الدور الأخير,اللي في الدور الأرضي بيعرفوا فبيلحقوا يملوا المياه,كلمة السر"يا عم عثمان,عندك في مياه؟و لا المياه قطعت؟"

سابعا:السبت
لما تحب تستخدم سبت (حقيبة من الخوص للتسوق) هيعتمد طول حبل السبت علي المسافة بينك و بين الشارع,يعني لو دورك أرضي,الحبل قصير,لو في الدور الأخير,بلاها سبت أحسن

طبعا في نقط اختلاف كتيرة ما بين الدور الأرضي و الأخير بس كفاية السبع نقط دول بس.
و طبعا لازم نخرج من المقارنة دي بحاجة مفيدة,مش دايما اللي علي خلي من العيوب و لا كل اللي وطي اتملا بالكروب