الحصان درجن

كان يا ما كان,في سالف العصر و الأوان,كان في حصان صغير اسمه درجن,ليه؟عشان كان بيجري درجن درجن درجن.
كان دايما بيسمع كلام مامته و باباه,و في مرة طلب من ماما يروح الغابة البعيدة.ماما قالت "مينفعش تروح لوحدك عشان خطر,و بعدين أنا مشغولة بجيب العشا"
مشي درجن و هو متضايق,و قرر ميسمعش كلام ماما,و يروح من غير متعرف.جري درجن درجن درجن عالغابة و لقي شجر تفاح و موز,"الله,تفاح لذيذ و موز ألذ,أنا هدخل أكتر يمكن ألاقي فاكهة أحلي"و دخل درجن درجن درجن و لقي شجر توت و شجر عنب,"الله,توت لذيذ و عنب ألذ,أنا هدخل أكتر يمكن ألاقي فاكهة أحلي"
و فضل يدخل درجن درجن درجن لحد ما الليل ليل و الشمس نزلت و القمر طلع,قرر درجن يروح بس فين الطريق؟ كل حتة فيها شجر,و مش باين فين طريق الخروج,فضل يجري درجن درجن درجن,خايف و قلقان,فين البيت,و قال "يا ريتني سمعت كلام ماما"
و فجأة سمع صوت صهيل ماما,جري درجن درجن درجن في اتجاه صوتها و لاقاها و جري في حضنها,و اعتذر ليها و قال مش هيخالف كلامها تاني,و لما روح البيت لقي العشا كل الفاكهة الحلوة اللي كان بيدوقها,بس ألذ من اللي كانوا عالشجر,لكن للأسف مقدرش ياكل لأن بطنه كانت اتملت من فاكهة الغابة,و خسر فاكهة العشا الجميلة لأنه مسمعش الكلام.
طبعا لو كان سمع الكلام من الأول كان أكل الفاكهة اللذيذة و مخافش و لا زعل باباه و مامته منه.
و أسف عالغيبة الطويلة بس أعمل ايه؟الابداع مش بيتباع