بحكم قراءتي للجرنال كل يوم,صفحات الأخبار بوجه خاص,أصبحت من الوقت للتاني أشبه مواقف و أحداث باللي بيحصل في عالم السياسة.
يعني حد اضطهدني و لا عاملني وحش أرد :شايفني فلسطين؟
واحد يقول كلام مش مصدقه أقوله:أنت بقيت زي الحكومة في كلامك,اسمع كلامك اصدقك,أشوف أمورك أستعجب.
هي عادة غريبة صحيح بس شايف ان الناس متقبلاها,يمكن لوجود تشابه فعلي للمواقف.
أخر موقف حصلي غريب.
غبت يوم من الصبح و لما رجعت لاقيت اللابتوب متوصل علي كوبس تاني غير اللي كان متوصل بيه,صراحة مفهمتش الحكمة من تغير مكان الفيشة من الكوبس الأولاني,اللي المفروض سليم لكوبس الفيشة فيه بتلمس.
عامة اتضح ان الكهربا ضربت في جزء من البيت,فاضطروا انهم يستخدموا الكوبس اللي شغال ساعتها.
المهم اليوم اللي بعده,قاعد في أمان الله علي الجهاز,و هوب فصل.أجيبه يمين و أجيبه شمال,مش شغال,أبص في كابل الطاقة بتاع اللابتوب ألاقي الكابل يكاد يكون مقطوع,العازل مفصول و كام سلكه مفصولة قلت يبقي المشكل في الكابل!أجيب واحد جديد في وقت تاني.
المهم رجعت,أشغله يشتغل,ابص عالكابل بنظرة شك,قلت يمكن المشكل ساعتها كان في الكهربا,ضربت تاني,و انا الأسبوع ده حظي مش قوي,مع اني مش بؤمن بالحظ!
المهم أخدت الجهاز اليوم اللي بعده الكلية,بعد كام ساعة شغل في البيت,افتح الجهاز هناك مبيفتحش.قلت مفيش غير الكابل ابن الكبل,قلت لو كدة استخدم كابل واحد زميلي,برده ماشتغلش,طب لا كهربا و لا كابل يبقي ايه؟اقول عالجهاز يرحمه ربنا,ادور علي توكيله و لا حاجة.
المهم اشتغلت في الكورس من غيره,أو مشتغلتش أصلا!
روحت البيت,أختي أخدته و شغلته,عادي خالص.اللي هو يعني الأخ بيتنك.
طبعا المحير هنا الجهاز و لا الكابل و لا الكهربا و لا ايه بالظبط,ده كدة و مجيبتش سيرة النت الهباب اللي مش عارف ان كانت المشكلة في الشركة و لا في الراوتر عند جاري و لا كابل النت و لا حتي السوكيت.
طب و الموقف ده بيفكركم بايه؟
و الله فكرني بحاجات كتير.
العبارة حالتها كانت سيئة و لا الكثافة كانت زيادة و لا القبطان هو اللي غلطان.
مجلس الشوري اللي غلطان و لا غياب أجهزة اطفاء و لا انذار و لا المطافي اللي بقدرة 5 محافظات مقدرتش تطفي الحريق الا بعد أكتر من 4 ساعات و لا يمكن مراسل المصري اليوم و مراسل الجزيرة اللي اتضربوا و اتمنعوا من متابعة الحدث,علي ايد شرطة المفروض يعني في خدمة الشعب,مش قفا الشعب.
طب الموضوع ليه كدة؟
ليه لما تحصل مشكلة نكتشف ان سببها واحد من ألف سبب؟
ليه متكونش كل الأسباب ساهمت في المشكلة؟
يعني أصابع الاتهام المفروض تتشاور علي 100 واحد في كل مشكلة,لكن اللي بيحصل ان الشعب بيشاور علي راس الحية و الحكومة بتطلعه براءة,و ابقي قابلني لو نلت نصيبك ان كنت من الضحايا.
و يمكن ده يأكد ان الحكومة الكترونية,زي الجهاز بتاعي اللي مش عارفله حال و لا خال
No comments:
Post a Comment