وجهة جزر

ممكن تكون ماشي في طريق غلط,و حد يشدك للطريق الصح,فتفتكر انك كنت ماشي في الطريق الصح و جابك للطريق الغلط,و ممكن تكون ماشي في الطريق الصح و صاحبك شايفك ماشي في الطريق الغلط فياخدك للطريق الغلط و هو فاكر انه مشاك في طريق الصح,طبعا الموضوع كله اختلاف في وجهات النظر,و الحل أكل الجزر لأنه بيقوي النظر,بس بيقوي وجهة النظر الصح و لا الغلط؟طبعا موضوع صح و غلط نسبي,يعني مفيش حاجة صح مية في المية و لا حاجة غلط مية في المية,و ممكن تلاقي حاجة خمسين في المية صح و خمسين في المية غلط,و دي حاجة كويسة لأنها محايدة,مهو نص العمي و لا العمي كله,و لأن العمي مش واضح ان كان الصح و لا الغلط,فنصه أحسن,و الموضوع مش مسألة حيرة,زي اللي بيقول انه بين جنة و نار,خاصة ان النار ممكن تكون دفا في الشتا القارص و ساعتها هتوفر في فلوس البطانية الجديدة و فاتورة الكهربا اللي هتولعها الدفاية,و طبعا فاتورة الغاز,لأنك مش هتحتاج بوتاجاز تسخن شوربة و لا تسخن عيش,بعدين العيش البلدي متنفعهوش نار عادية أبدا,ده محتاج يعدم حرقا و بعدين غرقا و لو لسة فيه مسامير ياخدوها,عشان يدقوا بيها شنكل الشباك المكسور بدل ما يلفوا و يدوروا في المصالح الحكومية.
طبعا موضوع المحايدة برده ليه مشاكله,مهو ما ينوب المحايد الا تقطيع هدومه,و المحايد بين البصلة و قشرتها ما ينوبه الا دمعتها,ده لو لسة عنده دموع,عاللي ماتله في الدويقة و اللي غرقله في مركب هجرة غير شرعي و اللي اتأسرله من قراصنة الصومال و اللي عييله من انفلونزا الطيور و اللي اتحرقله في أي حريقة من حرايق اليومين دول.
يعني لا ينفع صح و لا غلط و لا حتي محايد,يبقي ايه الحل؟
الحل بسيط,ممكن تتعلم الديبلوماسية,يعني اللي يسألك تقوله مبتشوفش,و لو قالك تعرفه,تقوله مبتعرفش,و مش هتكون غلط,مهو مين يعرف؟المحقق كرومبو لحد دلوقت مش لاقي حد عارف,يمكن لأن كل اللي عارفين ماشيين جوا الحيط,و اللي عرف و اتكلم اتاخد و اتختم علي قفاه,يبقي الحل في الخرس و الطرش,العمي لأ,لسة قايلين نصه اه كله لأ و بعدين احترنا في الحياد,حلو و لا وحش,و حلو و لا وحش في حد ذاتها وجهة نظر,انا هروح أكل جزر عشان محتاج أقوي وجهة النظر!!
و اترككم مع سؤال حلقة اليوم:انت ماشي في الطريق الصح و لا الغلط؟